Lögmennið sparar lestur

Hugbúnaðarfyrirtækið Fons Juris, sem hefur um árabil rekið rafrænt dóma- og lögfræðisafn, kynnti fyrr á árinu til sögunnar gervigreind undir nafninu Lögmennið.

Að sögn eigenda Fons Juris, lögfræðinganna Einars Sigurbergssonar og Sævars Guðmundssonar, gerir Lögmennið notendum kleift að „spjalla“ við dóma og tímaritsgreinar með skilvirkum hætti, eins og þeir kjósa að kalla gagnavinnsluna.

„Notendur geta beðið Lögmennið að lesa texta úr gagnasafni Fons Juris og svara svo spurningum úr textanum. Það getur til dæmis reifað textann í stuttu máli og útbúið gögn úr honum, t.d. ef lögmaður er að vinna með úrskurð Persónuverndar um tiltekið álitamál getur hann beðið Lögmennið að búa til tölvupóst til viðskiptavinar sem greinir niðurstöðu úrskurðarins,“ útskýrir Einar í samtali við Morgunblaðið.

Sævar segir gervigreindina ekki bara létta vinnu lögmanna, heldur einnig laganema við nám og próflestur, með því að reifa dóma með tilliti til ákveðinnar lagareglu sem kemur fram í dómunum.

„Í staðinn fyrir að þurfa að lesa yfir mjög langan dóm er hægt með þessari gervigreind að fá að vita á augabragði hvernig dómurinn reynir á það ágreiningsefni sem notandinn er skoða hverju sinni. Til að mynda hverjar voru málsástæður sóknaraðila, úrslit málsins eða hvaða lagareglur giltu um álitaefnin og margt fleira,“ segir Sævar.

Einar segir að gervigreindin sé tengd við allar tímaritsgreinar, dóma og úrskurði frá upphafi sem eru í gagnagrunni Fons Juris.

„Hún getur svarað spurningum um dóma frá árinu 1920 til dagsins í dag. Einnig getur Lögmennið svarað spurningum úr öllum tímaritsgreinum um lögfræði, t.d. í Úlfljóti og Tímariti lögfræðinga,“ segir Einar.