Hvað þýðir þetta tollahlé?

Donald Trump tilkynnti í vikunni 90 daga frestun á nýjum tollum fyrir mörg ríki, í þeirri von að skapa svigrúm til viðræðna um sanngjarnari viðskiptaskilmála. Þó voru ekki öll lönd undanskilin – sum greiða áfram verulega tolla og Kína stendur frammi fyrir harðari aðgerðum en áður.

Tollastaða eftir löndum

Kína: Tollar á kínverskar vörur voru nýverið hækkaðir í 145%, sem eru hæstu tollar sem Bandaríkin hafa beitt Kína til þessa. Þetta er viðbragð við verndaraðgerðum kínverskra stjórnvalda gagnvart innflutningi frá Bandaríkjunum.

Kanada og Mexíkó: Þrátt fyrir almennu frestunina halda 25% tollar áfram að gilda á vörur frá þessum löndum, nema þær sem uppfylla skilyrði USMCA-samningsins. Samningurinn, sem tók við af NAFTA árið 2020, veitir tollafslátt fyrir vörur sem uppfylla reglur um uppruna og framleiðslu innan bandalagsins.

Evrópusambandið, Japan og Suður-Kórea: Tollar lækkaðir í 10% og frekari hækkunum hefur verið frestað í 90 daga.

Rússland og Norður-Kórea: Undanskilin nýjum tollum, enda gilda nú þegar viðskiptabönn og refsiaðgerðir gagnvart þessum löndum.

Ísland nýtur ekki raunverulegs afsláttar

Ísland, Bretland, Ástralía og Brasilía: Halda áfram að greiða 10% grunntolla og verða ekki fyrir frekari hækkunum að sinni.

Staða Íslands breytist lítið við þessa tilkynningu. Landið var frá upphafi sett undir hinn almenna 10% toll og hefur ekki orðið skotmark sérstakra verndartolla. Þar sem þessi 10% tollur stendur enn óbreyttur felur frestunin ekki í sér beinan ávinning fyrir íslenskan útflutning – aðeins að frekari hækkunum er frestað tímabundið.

Ísland er því í svipaðri stöðu og önnur vestræn ríki sem ekki njóta sérsamninga – engar nýjar byrðar bætast við, en heldur ekki nýjar undanþágur. Óvissa ríkir þó áfram um næstu skref í stefnu Trumps og hvort fleiri ríki fái ívilnanir á komandi vikum.

Þá hefur bandaríska stjórnin einnig gefið til kynna að lagðir verði verndartollar á lyf, sem gæti haft áhrif á fyrirtæki á borð við Alvotech.