„Útkoman var framar vonum og erum við stolt af útkomunni,“ segir Heimir Örn Árnason, formaður bæjarráðs Akureyrar. Ársreikningar bæjarins fyrir árið 2024 eru komnir til umfjöllunar í bæjarráði og bíða afgreiðslu. Niðurstaða rekstrar A-hluta var jákvæð um 834 millj. kr. en áætlun gerði ráð fyrir því að niðurstaða yrði 632 millj. kr. í mínus. Sé allur pakkinn tekinn, það er samstæða Akureyrarbæjar, aðalsjóður og fyrirtæki í bæjareigu, eru tölurnar á sömu lund. Þar er niðurstaðan 2,2 milljarða afgangur eftir skatta og fjármagnsgjöld.
Meginskýringar á bættri afkomu eru, segir Heimir Örn, áhrif lækkandi verðbólgu á árinu og hófleg hækkun lífeyrisskuldbindinga ásamt nokkurri hækkun tekna frá Jöfnunarsjóði og þjónustutekna, einkum hjá hafnarsamlagi og veitum. „Einnig náðum við að hagræða í rekstri og halda vel utan um okkar stærstu verkefni.“
Veltufé frá rekstri var í árslok 5.736 millj. kr., 766 millj. kr. umfram áætlun. Handbært fé var 2.951 millj. kr. Launagjöld voru rétt tæpir 20 milljarðar eða um 53% af heildarútgjöldum. Fjárhagur þykir traustur og nam skuldaviðmið samstæðunnar í árslok 75% af ársveltu. Sé A-hlutinn einn skoðaður er viðmið um skuldir 54%.
„Þetta eru góðar tölur sem gefa svigrúm til uppbyggingar,“ segir Heimir Örn. Nefnir þar nýjan leikskóla í Hagahverfi, byggingu íbúðakjarna í Hafnarstræti og framkvæmdir á íþróttasvæðum. Þá séu einkaaðilar að byggja og fólki fari fjölgandi. Akureyringar eru nú 20.464. sbs@mbl.is
Til baka
Leita í greinasafni
Prenta grein