Komnar eru fram ásakanir á hendur Karim Khan yfirsaksóknara Alþjóðaglæpadómstólsins (ICC) um kynferðislega áreitni og misnotkun. Er það ungur lögfræðingur og samstarfsmaður hans sem segir Khan hafa neytt sig ítrekað til kynmaka í embættisferðum þeirra víða um heim. Var fyrst greint frá þessu um nýliðna helgi í bandaríska stórblaðinu Wall Street Journal og því slegið fram að Khan hafi í skyndi ákveðið að gefa út handtökuskipanir á hendur forsætisráðherra Ísraels, Benjamín Netanjahú, og fv. varnarmálaráðherra landsins, Yoav Gallant, í þeirri von að þagga málið niður. En handtökuskipanirnar voru gefnar út á sama tíma og mál Khans rataði á borð hjá innri skoðun ICC.
Meint fórnarlamb Khans segist margsinnis hafa ferðast með honum vegna vinnu sinnar og á misnotkun að hafa átt sér stað í ferðum m.a. til New York, Parísar, Kólumbíu, Kongó og Haag. Konan segist ekki hafa þorað að stíga fyrr fram af ótta við starfsmissi en hún óskaði eftir fundi með stjórnendum ICC í apríl 2024. Þar lýsti hún meintri misnotkun.
ICC gaf svo út handtökuskipun á áðurnefnda menn í júnímánuði sama ár þar sem þeir eru sakaðir um glæpi gegn mannúð og stríðsglæpi í tengslum við aðgerðir Ísraelshers í kjölfar ódæðis Hamas-liða 7. október 2023. Hátt í 1.200 manns voru þá myrtir, margir þeirra konur og börn, og um 250 manns fluttir nauðugir yfir til Gasa þar sem margir þeirra voru síðar misnotaðir og myrtir.
Neitar allri sök
Karim Khan hefur til þessa ekki viljað taka sér leyfi frá störfum fyrir ICC. Segir hann ásakanir konunnar ósannar með öllu og að þær hafi ekkert með handtökuskipanirnar að gera.
Til baka
Leita í greinasafni
Prenta grein