Skilyrði betri en blikur eru á lofti

Jón Ólafur Halldórsson hefur einn gefið kost á sér til formennsku í Samtökum atvinnulífsins, en rafræn kosning stendur nú yfir. Aðalfundur SA verður haldinn næstkomandi fimmtudag, 15. maí.

Jón Ólafur, sem er viðskipta- og véltæknifræðingur að mennt, hefur sinnt margvíslegum trúnaðarstörfum í atvinnulífinu á undanförnum árum. Hann hefur setið í stjórn SA síðasta áratuginn og verið þar í framkvæmdastjórn frá 2018. Þá var hann formaður Samtaka verslunar og þjónustu í sex ár. Á síðustu áratugum hefur Jón Ólafur gegnt ýmsum stjórnunarstörfum í fyrirtækjum. Hann starfaði hjá Olís í 27 ár og var forstjóri þar í sjö ár.

„Verðbólgan er á niðurleið og vextir að lækka. Með því batna starfsskilyrði allra og í atvinnulífinu má vænta að fjárfestingar aukist. En á sama tíma er ríkisstjórnin að auka álögur á atvinnuvegina, svo sem sjávarútveg og ferðaþjónustu, og slíkt gæti dregið kraftinn úr fólki til þess að fara í þau verkefni sem ráðast þarf í,“ segir Jón Ólafur í samtali við Morgunblaðið um stöðu efnahags- og atvinnulífs á líðandi stundu.

„Blikur á lofti í hinu alþjóðlega umhverfi geta haft áhrif á atvinnulífið á Íslandi,“ segir Jón Ólafur. „Allir munu tapa á tollastríði og áhrif þess gætu snert íslenskan vinnumarkað og forsendur kjarasamninga. Hér verður því að hafa heildarmyndina í huga og marga áhrifaþætti. Því er mikið áhyggjuefni við þessar kringumstæður að stjórnvöld skuli boða auknar gjaldtökur á tvær af undirstöðuatvinnugreinum þjóðarinnar í stað þess að vinna að því að styrkja efnahagslegar forsendur atvinnulífsins. En í augnablikinu er staðan í efnahagslífinu góð og mörg áhugaverð verkefni að fara af stað, eins og gjarnan er á vorin.”