Kreml lætur ekki Evrópu ráða för

Moskvuvaldið mun ekki samþykkja kröfur Evrópuríkja um vopnahlé í Úkraínu. Kænugarður hefur þegar sagst reiðubúinn til að hefja friðarviðræður við Kreml á fundi í Istanbúl næsta fimmtudag, en til að svo megi verða þá þurfa Rússar fyrst að samþykkja kröfur fjögurra meginríkja Evrópu um allsherjarvopnahlé næstu 30 daga. Úkraínuforseti hvetur Rússlandsforseta til að mæta sér í persónu á friðarfundi í Tyrklandi. Kreml hefur ekki svarað þessari áskorun beint.

„Sú orðræða að settar séu fram kröfur með þessum hætti er algjörlega óásættanleg af hálfu Rússlands. Þetta er bara alls ekki við hæfi. Engum leyfist að tala við Rússland með þessum hætti,“ segir Dmitrí Peskov talsmaður Kremlverja á símafundi með blaðamanni fréttaveitu AFP. „Við leggjum áherslu á að finna raunhæfar leiðir sem gefa af sér samkomulag um frið til lengri tíma,“ sagði hann enn fremur og neitaði um leið að svara hvort Rússland myndi senda fulltrúa frá stjórnvöldum til Istanbúl. Eins vildi Peskov ekki segja hver sá fulltrúi yrði, færi einhver frá Kreml yfirhöfuð.

Árásir Rússa halda áfram

Á sama tíma og talsmaður Kremlverja segir Moskvuvaldið reiðubúið til að semja um frið, þá héldu drónaárásir Rússlandshers áfram á Úkraínu, m.a. á Kænugarð. Var yfir 100 árásardrónum beitt gegn landinu í fyrrinótt og höfnuðu sumir þeirra á samgönguinnviðum og heimilum almennra borgara. Manntjón er þó sagt í lágmarki.

Leiðtogar Vesturlanda, þ. á m. Bandaríkjaforseti, hvetja Rússlandsforseta til að mæta Úkraínuforseta í persónu og komast um leið að ásættanlegri leið til vopnahlés.

Sjálfur segir Rússlandsforseti vart hægt að ræða vopnahlé af neinni alvöru nema „rót vandans“ sé einnig til umræðu. Þar á forsetinn vafalaust við réttlætingu Moskvuvaldsins fyrir árásarstríðinu – að verið sé að berjast gegn útbreiddum nasisma í Úkraínu. Aðrar áherslur Kremlar eru að afvopna landið, verja rússneskan minnihluta í austursvæðunum og koma í veg fyrir inngöngu Úkraínu í Atlantshafsbandalagið (NATO).