Hörð hríð að forseta og fjármálaráðherra

Þingmenn stjórnarandstöðunnar tóku sér hartnær klukkustund í upphafi þingfundar í gær til þess að ræða fundarstjórn forseta. Fundið var að því að forseti hefði með skömmum fyrirvara efnt til fundar á laugardag til þess að ljúka 1. umræðu um veiðigjaldafrumvarpið, en síðan ekki verið þess megnugur að fá ráðherra til þess að vera viðstaddur umræðuna.

Það var Daði Már Kristófersson, fjármála- og efnahagsráðherra, sem átti að gegna því hlutverki í fjarveru Hönnu Katrínar Friðriksson atvinnuvegaráðherra, sem var af landinu í fjölskylduerindum.

Hann lét hins vegar ekki sjá sig, en þegar eftir því var gengið á forseta á laugardag svaraði Þórunn Sveinbjarnardóttir forseti Alþingis því til að ráðherrann hefði verið upptekinn við skyldustörf, en hefði vissulega verið boðaður til umræðunnar og á leið í hús. Hann kom hins vegar ekki til umræðunnar, sem stóð í um tvær klukkustundir.

Ekki bætti úr skák að stjórnarliðar voru flestir horfnir út í helgina og þurfti að fresta þingfundi á laugardag í tvígang í von um að fá þá fleiri í hús til þess að afgreiða frumvarpið í nefnd í lok umræðu. Án árangurs.

Var annars staðar í húsinu

Það hleypti þó fyrst illu blóði í stjórnarandstöðuna, þegar í ljós kom að ráðherra hafði alls ekki verið á leiðinni í hús. Hann var á Alþingi allan tímann, en hirti ekki um að koma í þingsalinn. Þessa varð þingheimur áskynja þegar myndir tóku að birtast á Instragram af hópefli Viðreisnar í Smiðju, skrifstofubyggingu þingsins við Vonarstræti, en þar var ráðherrann hrókur alls fagnaðar.

Stjórnarandstæðingar röktu þetta í þinginu í gær og þótti vanvirða að ráðherra þættist hafa mikilvægari hnöppum að hneppa en að sækja þingfundi, en verra væri að falsað hefði verið um hvar ráðherrann væri.

„Hvernig var haldið á því að fá hæstvirtan fjármálaráðherra hér í salinn eftir að ítrekað hafði verið óskað eftir því að fá hann hingað?“ spurði Bergþór Ólason þingflokksformaður Miðflokksins. Þórunn Sveinbjarnardóttir forseti kvaðst ekki hafa vitað hvar ráðherrann hefði verið en skilaboðum hefði vissulega verið komið til hans.

„Ég átti von á að hér væri frekar verið að biðjast afsökunar heldur en halda áfram að bíta höfuðið af skömminni. En gott og vel. Ég vil minna þingheim á, og kannski ekki síst hæstvirtan ráðherra, að það er heilög skylda ráðherra að allir fundir víkja fyrir þingfundi,“ sagði Hildur Sverrisdóttir þingflokksformaður sjálfstæðismanna og velti fyrir sér viðbrögðum forseta ef í ljós kæmi að ráðherra hefði ekki sagt honum satt.

Það var ekki fyrr en í óundirbúnum fyrirspurnum sem Daði Már tók loks til máls um þetta og kvaðst hrærður yfir áhuga þingheims á nærveru sinni. Velvirðingar baðst hann hins vegar ekki.