Vilja enga þéttingu í Grafarvogi

„Borgin er að þreyta íbúa eins og veiðimaðurinn laxinn. Skipulagsferlið er í nokkrum fösum og fyrsti fasi var fyrir áramót og þá bárust 867 athugasemdir. Núna er borgin komin í nýjan fasa og þá núllast allar athugasemdir út og við þurfum öll að skila inn nýjum athugasemdum aftur,“ segir Sigrún Ásta Einarsdóttir, íbúi í Grafarvogi, sem berst gegn því að á henni og öðrum Grafarvogsbúum verði brotið með endurteknum tilraunum borgaryfirvalda til að þétta byggð.

Hún segir fólk ekki hafa áttað sig á því að borgin hafi tekið tillögur sínar frá því í haust til baka, gert á þeim einhverjar breytingar og ætli svo að keyra þær í gegn þrátt fyrir eindregin andmæli íbúa.

„Skilaboð fundarins í haust voru skýr. Við viljum enga þéttingu í Grafarvogi. Við búum í fullbyggðu hverfi sem við völdum að búa í, þar sem húsin eru lágreist og andrými. Það eru gæði sem við ætlum að standa vörð um og nýjar þéttingartillögur munu fá sömu undirtektir og þær fyrri. Borgaryfirvöld þurfa að átta sig á því að þétting í Grafarvogi verður ekki samþykkt.“

Sigrún Ásta segir það flókið fyrir mjög marga að skila inn athugasemdum vegna skipulagsmála.

Það þarf að aðstoða fólk

„Margir eiga erfitt með að skrifa texta og koma mótstöðu sinni í orð því þetta er öðruvísi en að mótmæla á Ísland.is, í þessu fyrirkomulagi þarf fólk að skila inn texta og alls ekki fyrir alla að fara í gegnum. Skilaboð íbúa í Grafarvogi eru mjög skýr. Við viljum enga þéttingu.“

Hún og nokkrir aðrir íbúar settu upp heimasíðuna www.okkargrafarvogur.com, þar sem þéttingarreitirnir eru sýndir og þar eru líka textatillögur sem fólk getur nýtt sem innblástur inn í sína athugasemd. „Það er þröskuldur fyrir fólk að skila inn mótmælum. Á heimasíðunni eru leiðbeiningar um hvernig á að skila inn athugasemd. Þar er líka tölfræði og uppfærsla á því hvað margar athugsemdir eru komnar inn. Í gær voru komnar fram 820 athugasemdir og rauði þráðurinn í gegn um öll þessi andmæli er að við viljum enga þéttingu.“

Undirskriftasöfnunin og fundarboðunin er ekki á vegum íbúasamtaka í Grafarvogi og segist Sigrún Ásta einfaldlega vera íbúi í Grafarvogi sem ásamt öðrum gangi í hús og útskýri fyrir fólki hvað standi til og að aftur þurfi að skila inn athugasemdum.