Unnið að útbreiðslu skíðaskotfimi hérlendis

Skíðaskotfimi er tiltölulega ný íþrótt hérlendis, en markvisst er unnið að útbreiðslu hennar innan Skíðasambands Íslands. Einar Ólafsson, formaður skíðagöngunefndar SKÍ og stjórnarmaður í skíðaskotfimideild sambandsins, skipulagði keppnisferð í samráði við Skíðasamband Grænlands fyrir skömmu og tók hópurinn þátt í Grænlenska meistaramótinu í skíðaskotfimi, sem fram fór í Nuuk. „Ferðin var hluti af innleiðingu skíðaskotfimi á Íslandi, að efla og kynna íþróttina hérlendis,“ segir hann um fyrstu þátttöku Íslendinga á móti í greininni erlendis.

Skíðasambandið er í Alþjóðatvíkeppnissambandinu, IBU, og keppni hérlendis er samkvæmt reglum þess. „Við reynum að bæta okkur með hverju móti og læra af öðrum þjóðum, meðal annars af Grænlendingum, sem eru komnir aðeins lengra en við,“ segir Einar. Bendir á í því sambandi að Sondre Slettemark hafi sigrað í unglingaflokki heimsbikarkeppni IBU í fyrravetur og Ukiloq, systir hans, hafi keppt á nýjustu Vetrarólympíuleikum. „Þau eru á meðal bestu skíðaskotfimistjarna heims í sínum aldursflokki,“ segir hann. „Við lærðum mikið af Grænlendingum í þessari ferð, bæði varðandi mótshald, meðferð skotvopna og hvernig eigi að bera sig að.“

Stefna hátt

Hver gönguhringur var 1,7 km. Fyrri daginn voru gengnir þrír hringir og fimm skotum skotið liggjandi eftir fyrsta hring og jafn mörgum standandi eftir annan hring. Seinni daginn voru gengnir fimm hringir og skotið fjórum sinnum, fimm skotum í hvert skipti.

Mari Järsk, sem hefur búið á Íslandi í mörg ár og er fremst keppenda á Íslandi, sigraði í sínum flokki fyrri keppnisdaginn og Salóme Grímsdóttir varð í 2. sæti. Ukiloq gat ekki verið með vegna veikinda en var með seinni daginn og sigraði af öryggi með nær 100% skotnýtingu. Nanna frá Grænlandi varð í 2. sæti og Mari Järsk í því þriðja. Sondre sigraði líka örugglega í karlaflokki, hitti í öllum 10 skotunum fyrri daginn og í 19 af 20 seinni daginn. Landar hans komu næstir í 2. og 3. sæti.

„Okkur gekk ekki vel í karlaflokki en þetta er erfið íþrótt,“ segir Einar. Ekki sé auðvelt að róa sig niður eftir snarpa göngu. „Það þarf að ná hjartslættinum niður til að geta hitt í mark.“ Hann hafi til dæmis hitt úr tveimur skotum liggjandi og einu standandi fyrri daginn, en úr þremur liggjandi og fjórum standandi seinni daginn. „Ekki einu sinni 50% hittni báða dagana,“ áréttar hann.

Einar segir að framtíðarmarkmiðið sé að eignast keppendur á alþjóðamótum eins og í heimsbikarkeppni IBU og á Vetrarólympíuleikum. „Við tökum lítil skref í einu og þurfum að byrja á því að einbeita okkur að aukinni útbreiðslu.“ Nú sé skíðaskotfimi einkum stunduð á Hólmavík, í Reykjavík, á Ísafirði og Akureyri. Strandamenn séu einna fremstir og Ísfirðingar, sem hafi haldð mót í um 20 ár, hafi bætt sig mikið með stuðningi SKÍ eftir að skíðaskotfimideildin var stofnuð fyrir nokkrum árum. Veronika Lagun, formaður skíðaskotfimideildarinnar, sé reyndasti keppandinn á Íslandi og hafi lagt sitt af mörkum í uppbyggingunni á Akureyri.

Að sögn Einars er stefnt að frekari samskiptum við Grænlendinga á þessu sviði. „Við höfum áhuga á því að fara aftur til Grænlands og Grænlendingar vilja líka koma til okkar og keppa en allt kostar þetta og við þurfum að treysta á styrki, meðal annars frá IBU.“