Friedrich Merz Þýskalandskanslari varaði við því í gær að ef engin hreyfing yrði á friðarviðræðum á milli Rússlands og Úkraínu í þessari viku, þá myndu ríki Evrópu herða verulega á viðskiptaþvingunum sínum gagnvart Rússlandi.
Merz skoraði einnig á Vladimír Pútín Rússlandsforseta að mæta til fundar í Istanbúl á morgun, fimmtudag, og samþykkja vopnahlé en Volodimír Selenskí Úkraínuforseti hefur sagt að hann muni bíða þar eftir Pútín.
Hrósaði Merz Selenskí fyrir hugrekki sitt og sagði að stríðinu yrði að ljúka. „Og þess vegna veitum við einnig hernaðaraðstoð, og ef það er nauðsynlegt munum við veita Úkraínumönnum hernaðaraðstoð í mörg ár ef stríðinu lýkur ekki,“ sagði Merz, en ríkisstjórn hans ákvað í vikunni að greina ekki lengur opinberlega frá því nákvæmlega í hverju herstuðningur Þjóðverja fælist.
Sagði Merz að ekki mætti samþykkja að hægt sé breyta landamærum Evrópu með hervaldi. „Ef við leyfum því að gerast munum við sjá frekari innrásír í öðrum Evrópuríkjum líka, og því ætti enginn að draga staðfestu okkar í efa,“ sagði Merz.
Kaja Kallas utanríkismálastjóri Evrópusambandsins sagði í gær að hún teldi ekki að Pútín myndi voga sér til Istanbúl til fundar við Selenskí. „Ég held að það væri gott skref ef þeir settust saman niður,“ sagði Kallas, en sagðist ekki eiga von á að Pútín myndi mæta.
Sagði Kallas að Rússar væru nú greinilega að reyna að tefja fyrir viðræðunum í þeirri von að tíminn væri á þeirra bandi. „Við höfum ekki séð neina góða viðleitni eða góð tákn frá þeirra hlið,“ sagði Kallas, en Úkraínumenn sögðu í gær að ef Pútín neitaði að koma til fundar í Tyrklandi væri það skýrt merki um að Rússar vildu ekki binda enda á innrás sína.
Til baka
Leita í greinasafni
Prenta grein