Dómsmálaráðuneytið hefur ákveðið að auglýsa stöðu lögreglustjóra á Suðurnesjum og hefur Úlfar Lúðvíksson, sem gegnt hefur embætti lögreglustjóra þar frá því í nóvember 2020, þegar látið af störfum. Til stóð að skipunartími Úlfars myndi renna út um miðjan nóvember nk., en eftir að vilji dómsmálaráðherra lá ljós fyrir óskaði Úlfar eftir að verða leystur frá störfum án tafar. Yfirgaf hann því embætti lögreglustjóra á Suðurnesjum á miðnætti.
Úlfar segir dómsmálaráðherra hafa boðað sig á fund sl. mánudag og voru ráðherra og ráðuneytisstjóri viðstaddir fundinn. Þar var honum kynntur vilji ráðuneytisins til að auglýsa embættið og endurnýja þannig ekki skipunartíma Úlfars. Mun ákvörðun ráðherra hafa komið Úlfari í opna skjöldu.
Segist hann þá í kjölfarið hafa óskað eftir því að verða leystur frá embætti án tafar og varð dómsmálaráðherra við þeirri ósk. Samhliða gekk ráðuneytið frá starfslokum.
„Ég held að ákvörðun mín [um að óska eftir tafarlausum starfslokum] segi til um niðurstöðu þessa fundar,“ segir Úlfar spurður út í samskipti hans við ráðherra á fundinum.
Spurður hvort hann hafi í hyggju að sækjast áfram eftir starfi innan lögreglunnar kveður Úlfar nei við. Hans tíma þar sé lokið. Starfsfólki embættisins voru tilkynnt starfslok Úlfars á fundi í gær.
Margrét tekin við
Margrét Kristín Pálsdóttir, aðstoðarlögreglustjóri á höfuðborgarsvæðinu, hefur tímabundið tekið við embætti lögreglustjórans á Suðurnesjum. Mun hún gegna stöðunni þar til embættið verður auglýst laust til umsóknar.
Til baka
Leita í greinasafni
Prenta grein