Rússar bera alla ábyrgð að mati ICAO

Rússar bera alla ábyrgð á örlögum farþegaþotunnar MH17, sem rússneskumælandi aðskilnaðarssinnar skutu niður árið 2014, að mati alþjóðaflugmálastofnunarinnar ICAO, en stofnunin úrskurðaði í fyrrinótt í kærumáli sem stjórnvöld í Hollandi og Ástralíu höfðuðu á hendur Rússlandi vegna atviksins.

Vélin var á leiðinni frá Amsterdam í Hollandi til Kúala Lúmpúr í Malasíu hinn 17. júlí 2014, þegar hún var skotin niður yfir Donetsk-héraði. Öll áhöfnin og allir farþegar um borð, alls 298 manns, fórust þegar vélinni var grandað, en flestir þeirra komu frá Ástralíu og Hollandi. Rússar hafa hins vegar alltaf neitað sök, en dómstóll í Hollandi dæmdi þrjá menn í fangelsi, þar af tvo Rússa, árið 2022 fyrir aðild sína að árásinni.

Í niðurstöðu ICAO kom fram að hún teldi að kröfur Hollendinga og Ástrala á hendur Rússum væru studdar bæði af staðreyndum og alþjóðalögum. Mun stofnunin gefa út ítarlegar niðurstöður síðar, en í tilkynningu hennar sagði að Rússland hefði ekki staðið við skyldur sínar samkvæmt alþjóðalögum um flug, sem kveða m.a. á um að ríki eigi að forðast að beita vopnum gegn borgaralegum flugvélum á flugi.

Fagna niðurstöðu ICAO

Utanríkisráðherra Ástralíu, Penny Wong, sagði í yfirlýsingu að Ástralir skoruðu á Rússa að viðurkenna loks ábyrgð sína á þessu „hryllilega ofbeldisverki“ og greiða skaðabætur fyrir sína „smánarlegu hegðun“. Utanríkisráðherra Hollands, Caspar Veldkamp, sagði í sinni yfirlýsingu að niðurstaða ICAO markaði mikilvægt skref í áttina að réttlæti og ábyrgð og að hún sýndi að ríki gætu ekki brotið alþjóðalög án þess að refsað yrði fyrir það.

Ekki er búið að ákveða hvaða viðurlögum eigi að beita Rússa, en Ástralir og Hollendingar vilja að Rússar verði skikkaðir til að hefja viðræður við sig um skaðabætur handa fjölskyldum fórnarlambanna.

Dmitrí Peskov, talsmaður Pútíns Rússlandsforseta, sagði í gær að Rússar viðurkenndu ekki „bjagaðar niðurstöður“ ICAO, þar sem Rússar hefðu ekki tekið þátt í rannsókn málsins.