Samningur upp á 45,6 milljónir

Starfslokasamningarnir 11 sem Reykjavíkurborg gerði við skólastjórnendur og aðra stjórnendur á vettvangi skóla- og frístundasviðs borgarinnar á tímabilinu 2015 til maí 2024 eru miskostnaðarsamir og taka til mislangs tíma.

Sá lengsti og jafnframt sá dýrasti tekur til 22 mánaða og kostaði borgina 45,6 milljónir, að teknu tilliti til launatengdra gjalda. Sá stysti var aftur á móti til fimm mánaða, en kostnaður vegna hans nam rúmum 14 milljónum. Meðalfjárhæð starfslokasamninganna er um 29 milljónir, en árlegur kostnaður borgarinnar af samningunum nam 37,6 milljónum að meðaltali.

Í svari skóla- og frístundasviðs borgarinnar við fyrirspurn tveggja fulltrúa Sjálfstæðisflokksins í skóla- og frístundaráði, þeirra Mörtu Guðjónsdóttur og Helga Áss Grétarssonar, segir að bæði sé um að ræða leikskólastjóra og grunnskólastjóra. Í fimm af 11 tilfellum hafi viðkomandi stjórnandi verið að nálgast starfslok vegna aldurs og upp kominna veikinda og því niðurstaðan orðið sú að komast að samkomulagi um starfslok.

Í hinum tilfellunum sex hafi lífaldur viðkomandi verið á bilinu 45-60 ára og þar hafi verið um hagsmunamat að ræða.

„Þar sem aðilar voru sammála um að forsendur fyrir viðkomandi til þess að stýra skólanum voru ekki lengur til staðar hvort sem það var út frá aðstæðum á staðnum og/eða annars sem upp kom í tengslum við stjórnandann og stjórnun skólans,“ segir í svarinu.

Marta segir svarið þó ekki tæmandi. Spurt hafi verið um hvaða stöðum viðkomandi starfsmenn hafi gegnt og hverjar ástæður starfslokanna hafi verið, en engu hafi verið svarað þar um. Hún segir nauðsynlegt að fá svör við því til þess að unnt sé að átta sig á hvar vandinn liggi og hvað búi að baki starfslokunum.

Hún segist og vita til þess að fleiri starfslokasamningar á vettvangi skóla- og frístundaráðs hafi verið gerðir eða séu í bígerð. Fyrirspurn segir hún vera væntanlega vegna þeirra.

„Þessar tölur gefa til kynna að þarna sé um stjórnunarvanda að ræða sem felst í því að borgin grípur til úrræða sem kosta hana háar fjárhæðir til að koma stjórnendum innan skóla- og frístundasviðs frá. Það er ekki í samræmi við almennar reglur á sviði starfsmannaréttar. Þetta er óeðlilegt,“ segir Helgi Áss, sem kveður þetta lýsa starfsháttum sem viðgengust hjá fyrri sviðsstjóra skóla- og frístundasviðs og lýsi menningu um að í lagi sé að skattgreiðendur leysi starfsmannamál með dýrum starfslokasamningum.