Væb Ólgandi lífsgleði einkennir bræðurna.
Væb Ólgandi lífsgleði einkennir bræðurna. — Morgunblaðið/Eggert
Sú sem þetta skrifar er svo menningarlega sinnuð að ekki hvarflaði að henni að horfa á Eurovision. Hún frétti þó að Væb-bræður hefðu komist í úrslitakeppnina og sá í tíu-fréttum RÚV viðtal við þá þar sem þeir fögnuðu árangrinum og sýnt var brot úr flutningi þeirra

Kolbrún Bergþórsdóttir

Sú sem þetta skrifar er svo menningarlega sinnuð að ekki hvarflaði að henni að horfa á Eurovision. Hún frétti þó að Væb-bræður hefðu komist í úrslitakeppnina og sá í tíu-fréttum RÚV viðtal við þá þar sem þeir fögnuðu árangrinum og sýnt var brot úr flutningi þeirra.

Bræðurnir ungu sögðust vera stoltir af að hafa sungið á íslensku. Ljósvakahöfundur tók ekki eftir því þar sem hún skildi ekki eitt einasta orð í textanum sem þeir sungu. Hann hefði allt eins getað verið á latínu. En hvað um það. Bræðurnir eru svo lífsglaðir að ekki er annað hægt en að líka vel við þá. Þeir hafa einstakt lag á að tala báðir í einu þannig að einungis helmingurinn af því sem þeir segja kemst til skila. Orka þeirra, jákvæðni og ótamin gleði skilar sér hins vegar fullkomlega. Það er gott á tímum þar sem illa liggur á svo mörgum. Vonandi mun ekkert draga úr lífsgleði bræðranna þegar aldurinn færist yfir þá.

Ljósvakahöfundur mun ekki horfa á Eurovision, sem henni finnst skelfilegt sjónvarpsefni. Hún óskar bræðrunum hins vegar alls hins besta. Hvernig sem fer er rétt að hafa í huga að í jafn vondri keppni og Eurovision er engin skömm að tapa.

Höf.: Kolbrún Bergþórsdóttir