VÆB Bræðurnir hafa farið á kostum í Basel.
VÆB Bræðurnir hafa farið á kostum í Basel. — AFP/Sebastien Bozon
„Íslenskan er með 100% reisíó að komast í fænalið,“ sagði sigurreifur Stóri-VÆB, Hálfdán Helgi Matthíasson, í einkasamtali við Gunnar Birgisson, fréttamann Ríkisútvarpsins, eftir að atriðið sem hann á aðild að hafði komist í sjálf úrslit Júróvisjón-keppninnar í Basel á þriðjudagskvöldið

Orri Páll Ormarsson

„Íslenskan er með 100% reisíó að komast í fænalið,“ sagði sigurreifur Stóri-VÆB, Hálfdán Helgi Matthíasson, í einkasamtali við Gunnar Birgisson, fréttamann Ríkisútvarpsins, eftir að atriðið sem hann á aðild að hafði komist í sjálf úrslit Júróvisjón-keppninnar í Basel á þriðjudagskvöldið. Hálfdán og bróðir hans, Matthías Davíð Matthíasson, Litli-VÆB, syngja lag sitt, Róa, stoltir á íslensku og það kom að sjálfsögðu upp í viðtalinu sem Gunnar stýrði af miklu fumleysi. Það getur verið snúið að ná utan um þá VÆB-bræður, þeir eru svo spriklandi fjörugir.

Hálfdán hafði varla sleppt orðinu þegar upp tók sig Gísli heitinn Jónsson menntaskólakennari hjá bróður hans. „Þetta var ekkert eðlilega mikil sletta hjá þér þegar þú sagðir þetta,“ sagði Matthías og reif gula spjaldið upp úr vasanum. Síðan hækkuðu þessir miklu gleðigjafar hlátur sinn um nokkrar áttundir svo undir tók í sönghöllinni í Basel. Aumingja Gunnar vissi ekki hvort hann var að koma eða fara.

VÆBararnir eru frábærar týpur og verðugir fulltrúar okkar á þessu eldhressa söng- og búningamóti. Megi þeim ganga sem allra best annað kvöld. En Sánu-Svíarnir verða erfiðir við að eiga.

Höf.: Orri Páll Ormarsson