Hálft ár varð að þrettán árum

Gerður Sæmundsdóttir fæddist 16. maí 1950 á heimili foreldra sinna í Hveragerði. „Það var ljósmóðir sem bjó í næstu götu sem tók á móti mér. Hveragerði var hálfgert bændasamfélag, þótt það væri þorp í sveit og allir þekktu alla. Faðir minn var með kindur og nánast annar hver maður var með kindakofa á lóðinni hjá sér. Svo voru það garðyrkjumennirnir. Það voru eiginlega allir með einhverja heimilissýslu meðfram annarri vinnu.“

Eftir grunnskólann fór Gerður í Hlíðardalsskóla, en sjöunda dags aðventistar ráku skólann. „Við vorum ekki sjöunda dags aðventistar í fjölskyldunni, en ég var komin á þann aldur að mig langaði að hleypa heimdraganum og Hlíðardalsskóli hafði gott orð á sér. Þar kynntist ég ströngum aga og lauk þaðan gagnfræðaprófi.“

Eftir gagnfræðaprófið fór Gerður til Englands ásamt nokkrum skólasystkinum til Newbold College í Binfield. „Það var alþjóðlegur skóli og þarna eignaðist ég marga félaga sem ég er enn í sambandi við, þökk sé Facebook. Þetta var mikil lífsreynsla og það var mikil áhersla á trúmál og biblíulestur,“ segir Gerður sem var í skólanum í tvö ár. „Svo var ég spennt fyrir að læra ensku, því á þessum árum, þegar ég var 16-17 ára, var draumurinn að verða einkaritari. En ég kastaði af mér þeim draumi fljótlega.“

Þegar Gerður kom heim eftir Englandsdvölina fór hún að vinna á Heilsustofnuninni í Hveragerði. „Ég var að uppvarta í borðstofunni, sem kallað var. Þar kynntist ég yfirhjúkrunarkonunni sem hvatti mig að sækja um í Hjúkrunarskólanum.“ Það var biðlisti að komast inn í skólann og Gerður vann aðeins í Búnaðarbankanum í Hveragerði og fór síðan til Kaupmannahafnar og vann þar í banka. „Svo fékk ég boð um áramótin 1970-71 að það hefði losnað pláss í skólanum.“

Hún segir að hjúkrunarnámið og heimavistin hafi verið mjög skemmtileg. „Við vorum uppátækjasamar, þótt það væri nú allt mjög saklaust, en það var strangur agi á heimavistinni, og bara útivistarleyfi tvisvar í viku og heimsóknarleyfi einu sinni í viku. En kannski var það þessi strangi agi sem gerði þennan tíma svo eftirminnilegan,“ segir hún og bætir við að í fyrra hafi skólasysturnar fagnað 50 ára útskriftarafmæli, en þær hafa haldið sambandi alla tíð og reyna að hittast á tveggja mánaða fresti.

Gerður útskrifaðist sem hjúkrunarfræðingur 9. mars 1974 og vann í nokkra mánuði á Borgarspítalanum. „Þá fór ég aftur til Danmerkur með vinkonu minni, en við ætluðum að vera þar í hálft ár. Það endaði þó þannig að ég var í rúm þrettán ár og hún er þar enn,“ segir Gerður og hlær. „Hún kynntist Dana og ég kynntist manninum mínum, Berndt, sem var frá Finnlandi og við giftum okkur 7. október 1974 í Ráðhúsi Kaupmannahafnar.“ Gerður lærði skurðstofuhjúkrun á St. Elisabet-spítalanum í Kaupmannahöfn og vann við það í mörg ár. Hjónin keyptu sér raðhús í Dragör og eignuðust börnin. Árið 1987 fluttu þau til Íslands. Gerður vann fyrstu tvö árin sem skólahjúkrunarfræðingur í Seljaskóla, en fór síðan að vinna á öldrunarlækningadeild Landspítalans sem var í Hátúni. Síðan sótti hún um deildarstjórastöðu hjá Hjúkrunarheimilinu Eir. „Mín deild var fyrsta sérhannaða deildin fyrir sjúklinga með heilabilun á Íslandi. Þessir einstaklingar hafa mikla hreyfiþörf og það var garður út af deildinni þar sem hægt var að rækta og sitja úti í góðu veðri og það var virkilega gott starfsfólk.“

Síðan varð Gerður hjúkrunarstjóri yfir bæði sinni deild og yfir deild fyrir blinda sjúklinga. „Þar var allt málað í þeim litum sem fólk sér lengst sem er komið með mjög slæma sjón og við notuðum hljóð sem kennileiti til að auðvelda lífið fyrir sjúklingana.“

Gerður tók diplómanám í stjórnun á ferlinum og fjölmörg stjórnunarnámskeið. Hún segist alltaf hafa horft til Norðurlandanna með hugmyndir í sínu starfi. „Norðurlöndin eru mjög framarlega í að hanna rými og þeir huga meira að mannlega þættinum en víða annars staðar.“

Árið 1999 réð Gerður sig sem deildarstjóra á öldrunarlækningadeild fyrir sjúklinga með heilabilun á Landakoti. Hún vann þar fram til 2016, en síðan í hlutastarfi til sjötugs.

„Hér í Kópavogi er gott að vera eldri borgari. Ég geri líkamsæfingar með Virkni og vellíðan fyrir 60 ára og eldri tvisvar í viku og svo fer ég í sund og út að ganga. Það er nefnilega fullt starf að halda sér hressum þegar maður eldist,“ segir hún og hlær.

„Svo er ég nýbyrjuð að spila bridds og við erum fjórar sem spilum einu sinni í viku og ég dunda mér við að spila golf líka. Svo les ég mikið og hlusta á útvarp og öll þessi góðu hlaðvörp og fylgist vel með daglega lífinu og stjórnmálum.“

Fjölskylda

Eiginmaður Gerðar var Berndt Olov Edvard Grönqvist, f. 6.10. 1946, d. 4.12. 2004, starfaði sem sölumaður hjá SAS í Kaupmannahöfn og í fraktdeild Icelandair.

Börn Gerðar og Berndts eru 1) Róbert Ragnar Grönqvist, f. 20.9. 1979, framkvæmdastjóri hjá Fossum fjárfestingarbanka. Hann á börnin Guðrúnu Emmu, f. 2009; Benedikt, f. 2012; og Kristján, f. 2017 með fv. eiginkonu, Önnu Maríu Leifsdóttur, f. 1979. Hann er núna í sambúð með Halldóru Ingimarsdóttur, verkefnastjóra hjá Sjóvá. 2) Christina Guðrún Grönqvist, f. 10.6. 1982, förðunarfræðingur, gift Grétari Orra Kristinssyni, f. 1980, forritara.

Systkini Gerðar eru Aðalsteinn, f. 4.9. 1931, d. 31.10. 1951; og Helga Dís, f. 12.2. 1943, d. 21.2. 2007.

Foreldrar Gerðar eru Sæmundur Guðmundsson, bóndi á Bakkarholtsparti, Árn. og síðar vinnumaður í Hveragerði, f. 2.5. 1904, d. 25.4. 1997 og Guðrún Þorláksdóttir húsfreyja, f. 9.1. 1906, d. 30.5. 1989.