Grafarvogsbúar gefast ekki upp

Mikill hiti var í um 400 Grafarvogsbúum sem mættu á samstöðufund gegn áformum borgaryfirvalda um að þétta byggð í Grafarvogi með uppbyggingu íbúðarhúsnæðis á „smærri vannýttum svæðum“ innan hverfisins.

Hafa þessi áform vakið mikla reiði meðal íbúa í Grafarvogi en fyrir áramót settu um 800 Grafarvogsbúar út á tillöguna í skipulagsgátt.

Var henni breytt lítillega í tilraun til að koma til móts við íbúa en það dugði ekki til. Rétt áður en seinni athugasemdafrestur rann út í gærkvöldi höfðu hátt í 1.300 manns sent inn athugasemdir en langflestar þeirra voru frá ósáttum íbúum.

Vilji íbúa skýr

Sigrún Ásta Einarsdóttir, íbúi í Grafarvogi og einn skipuleggjandi íbúafundarins, er ein þeirra sem hafa barist hvað harðast gegn þessum fyrirætlunum borgarinnar.

„Hér er gífurlega mikil reiði á meðal íbúa. Við erum mörg hver búin að vera að ganga í hús og það eru örfáir sem við erum búin að hitta sem eru ekki brjálaðir … Þetta er grasrótarstarf í sinni tærustu mynd,“ sagði Sigrún Ásta í samtali við Morgunblaðið að fundi loknum.

Í erindi sínu ræddi hún meðal annars hvernig borgaryfirvöld hafa, frá því að þessar hugmyndir voru kynntar fyrst, heitið því að eiga í samráði við íbúa en það hafi ekki verið raunin.

„Það hafa mörg fögur orð fallið um ferli og samtal og samráð en þetta eru orð sem við tengjum ekkert við í upplifun okkar. Hér er verið að ganga þvert á grunnuppbyggingu og hverfisandann í Grafarvogi. Hér erum við búin að kjósa að búa í lágreistu umhverfi með grænum svæðum,“ segir Sigrún Ásta.

Spurð hvort hún hafi trú á að borgaryfirvöld muni hlusta á raddir Grafarvogsbúa í þetta sinn kveðst Sigrún Ásta ekki viss.

„Ég hélt það í haust, þá hélt ég að það væri svo skýrt hver vilji íbúa í Grafarvogi og þar með íbúa í Reykjavík væri. Ég hélt að þetta væri mjög skýrt en þetta virðist alltaf koma þeim á óvart, alveg sama hversu margir mótmæla og hversu hörð þau mótmæli eru.

Vissulega vil ég trúa því að þau muni hlusta núna, nú þegar við erum að fara að skila inn svo miklu, miklu fleiri athugasemdum í ferli tvö, þar sem þau hreyktu sér af því í fjölmiðlum að þau hefðu komið til móts við óskir íbúa, sem þau svo sannarlega gerðu ekki.“

Í erindi sínu sagði Sigrún Ásta að íbúar Grafarvogs myndu ekki gefast upp, jafnvel þótt ekki yrði hlustað á umsagnir þeirra. Í því samhengi nefndi hún mögulega hópmálsókn íbúa gegn borginni sem og möguleikann á að knýja fram íbúakosningu.

Spurð hvort alvara fylgi þessum orðum segir hún:

„Já, full alvara. Við ætlum ekki að hætta.“

Um lungu íbúa að ræða

Það var greinilegt á fundargestum að þeir hyggjast ekki gefast upp í baráttunni um hverfið sitt en í samtali við Morgunblaðið sagði Jóhanna K. Eyjólfsdóttir Grafarvogsbúi:

„Það eru svo mikil lífsgæði að búa hérna. Á sínum tíma sagði Dóra Björt Guðjónsdóttir borgarfulltrúi að þetta væru bara einhverjir grænir blettir sem ætti að byggja á en þetta eru lungun okkar. Heimili er ekki bara eldhús og stofa og svefnherbergi, heimili er umhverfið sem þú býrð í og hér í Grafarvogi hefurðu aðgang að samfélagi, náttúrufegurð og svo mörgu sem þessi þétting myndi gjörbreyta.

Það skiptir svo miklu máli að huga að því að heimili er mannréttindi en það þarf líka að tryggja að þau mannréttindi byggist á lífsgæðum, ekki bara á einhverjum kössum.“

Annar fundargestur, Þorsteinn Hauksson, sem búið hefur í Grafarvogi í 22 ár, var heldur ekki sáttur: „Þetta er gjörsamlega klikkað, albrjálað. Þetta er eyðileggingarstarfsemi í hæsta máta.“