Knattspyrnumaðurinn Viktor Örlygur Andrason hefur skrifað undir nýjan samning við uppeldisfélag sitt Víking úr Reykjavík sem gildir út árið 2028. Viktor, sem er 25 ára gamall, lék sína fyrstu leiki í efstu deild fyrir Víking sumarið 2016

Knattspyrnumaðurinn Viktor Örlygur Andrason hefur skrifað undir nýjan samning við uppeldisfélag sitt Víking úr Reykjavík sem gildir út árið 2028. Viktor, sem er 25 ára gamall, lék sína fyrstu leiki í efstu deild fyrir Víking sumarið 2016. Hann varð Íslandsmeistari með liðinu árin 2021 og 2023 og bikarmeistari árin 2019, 2021, 2022 og 2023.

Englandsmeistarar Liverpool hyggjast virkja kaupákvæði í samningi hollenska knattspyrnumannsins Jeremies Frimpongs, sem leikur með Bayer Leverkusen. Breska ríkisútvarpið greinir frá því að Liverpool muni virkja ákvæði upp á 29,5 milljónir punda í samningi Frimpongs. Honum er ætlað að fylla skarðið sem Trent Alexander-Arnold skilur eftir sig en hann er á förum til Real Madrid.

Patrekur Jóhannesson, handknattleiksþjálfari og fyrrverandi landsliðs- og atvinnumaður, hefur verið ráðinn til starfa frá og með 1. ágúst á svæðisstöð höfuðborgarsvæðisins, sem er samstarfsverkefni ÍSÍ og UMFÍ. Hann mun vinna sem svæðisfulltrúi við hlið Hansínu Þóru Gunnarsdóttur sem gegnir því starfi fyrir.

Kylfingurinn efnilegi Gunnlaugur Árni Sveinsson hafnaði í fjórða sæti á svæðismóti bandarísku háskólanna sem lauk í Virginíu í gær. Hann lék hringina þrjá á 72, 68 og 66 höggum, samtals fjórum höggum undir pari vallarins og var aðeins einu höggi frá öðru sætinu. Sigurvegarinn, Jackson Van Paris frá Vanderbilt-háskólanum, vann mótið á átta höggum undir pari.

Sænski knattspyrnumaðurinn Dejan Kulusevski leikur ekki á ný með Tottenham fyrr en í haust eftir að hafa gengist undir aðgerð á hné. Hann missir því af úrslitaleik Evrópudeildarinnar þar sem Tottenham mætir Manchester United þann 21. maí í Bilbao á Spáni.

Jamie Vardy mun spila sinn síðasta leik fyrir enska knattspyrnufélagið Leicester City á sunnudaginn, þrátt fyrir að liðið eigi þá einn leik eftir í ensku úrvalsdeildinni. Leicester mætir Ipswich á heimavelli í næstsíðustu umferðinni og verður það 500. leikur Vardys fyrir Leicester. Hann hefur gert samkomulag við félagið um að það verði kveðjuleikurinn á þrettán ára ferli hans í Leicester.