Endurkoma Agla María Albertsdóttir er í landsliðshópnum á nýjan leik.
Endurkoma Agla María Albertsdóttir er í landsliðshópnum á nýjan leik. — Morgunblaðið/Árni Sæberg
Landsliðsfyrirliðinn Glódís Perla Viggósdóttir er komin í hópinn á ný fyrir leikina gegn Norðmönnum og Frökkum í Þjóðadeildinni í fótbolta og Agla María Albertsdóttir snýr aftur í hópinn eftir átján mánaða fjarveru

Landsliðið

Víðir Sigurðsson

Bjarni Helgason

Landsliðsfyrirliðinn Glódís Perla Viggósdóttir er komin í hópinn á ný fyrir leikina gegn Norðmönnum og Frökkum í Þjóðadeildinni í fótbolta og Agla María Albertsdóttir snýr aftur í hópinn eftir átján mánaða fjarveru.

Þorsteinn Halldórsson landsliðsþjálfari tilkynnti í gær 23 manna hóp fyrir leikina tvo en spilað er gegn Norðmönnum í Þrándheimi 30. maí og gegn Frökkum á Laugardalsvellinum 3. júní, en ef allt fer samkvæmt áætlun verður það vígsluleikur þjóðarleikvangsins í núverandi mynd.

Miðað við Laugardalsvöllinn

„Öll okkar plön miðast að því að leikurinn gegn Frökkum fari fram á Laugardalsvelli en við erum með velli til vara ef svo ólíklega vildi til að Laugardalsvöllur verði ekki orðinn leikfær,“ sagði Þorsteinn við Morgunblaðið í gær, en íslenska liðið lék heimaleiki sína í apríl gegn Noregi og Sviss á Þróttarvellinum í Laugardal.

Glódís var ekki með gegn Noregi og Sviss og hefur spilað takmarkað undanfarnar vikur með Bayern München vegna beinmars í hné.

„Við þurfum að sjá hvernig hún verður eftir Noregsleikinn en eins og staðan er í dag þá er ég að velja hana til þess að spila báða leikina, hvort af því verður þarf svo bara að koma í ljós,“ sagði Þorsteinn.

Gott að fá Öglu Maríu aftur

Hann kvaðst fagna því að fá Öglu Maríu aftur í hópinn en hún hefur ekki gefið kost á sér í nokkurn tíma og spilaði síðast með landsliðinu í desember 2023.

„Það er mjög gott að fá Öglu Maríu aftur í hópinn. Hún gefur okkur góða breidd fram á við og sóknarmöguleika sem hjálpa okkur. Við áttum gott spjall og það voru og hafa aldrei verið nein vandamál okkar á milli. Þetta snerist alfarið um hennar löngun þegar kemur að fótboltanum,“ sagði Þorsteinn en Glódís og Agla María koma í stað Elísu Viðarsdóttur og Andreu Ránar Hauksdóttur.

Ísland er í harðri baráttu við Noreg og Sviss um annað og þriðja sæti riðilsins í A-deild Þjóðadeildarinnar en Frakkar hafa þegar unnið riðilinn með 12 stig. Noregur er með 4 stig, Ísland 3 og Sviss 2.

Norska liðið myndi því tryggja sér annað sætið og áframhaldandi sæti í A-deild með sigri í Þrándheimi, svo framarlega sem Sviss ynni ekki Frakkland á sama tíma.

Hópurinn er þannig skipaður:

Markverðir:

Cecilía Rán Rúnarsdóttir, Inter

Telma Ívarsdóttir, Breiðabliki

Fanney Inga Birkisdóttir, Häcken

Varnarmenn:

Glódís Perla Viggósdóttir, Bayern

Ingibjörg Sigurðardóttir, Bröndby

Guðrún Arnardóttir, Rosengård

Guðný Árnadóttir, Kristianstad

Áslaug Munda Gunnlaugsd., Breið.

Sædís Rún Heiðarsdóttir, Vålerenga

Natasha Anasi, Val

Miðjumenn:

Dagný Brynjarsdóttir, West Ham

Alexandra Jóhannsd., Kristianstad

Karólína L. Vilhjálmsd., Leverkusen

Hildur Antonsdóttir, Madrid CFF

Berglind Rós Ágústsdóttir, Val

Hafrún Rakel Halldórsd., Bröndby

Katla Tryggvadóttir, Kristianstad

Sóknarmenn:

Agla María Albertsd., Breiðabliki

Sandra María Jessen, Þór/KA

Sveindís Jane Jónsdóttir, Wolfsburg

Hlín Eiríksdóttir, Leicester

Amanda Andradóttir, Twente

Emilía Kiær Ásgeirsdóttir, Leipzig

Höf.: Víðir Sigurðsson