Ingólfur Ómar Ármannsson sækir yrkisefnið í dýraríkið og þar ber hrafninn á góma: Hoppa lömb um laut og börð létt og kvik í spori, sveimar kringum sauðahjörð soltinn hrafn að vori. Og refurinn fær sitt: Æti grefur oní jörð eðli slungið hefur

Pétur Blöndal

p.blondal@gmail.com

Ingólfur Ómar Ármannsson sækir yrkisefnið í dýraríkið og þar ber hrafninn á góma:

Hoppa lömb um laut og börð

létt og kvik í spori,

sveimar kringum sauðahjörð

soltinn hrafn að vori.

Og refurinn fær sitt:

Æti grefur oní jörð

eðli slungið hefur.

Svæsinn er í sauðahjörð

soltinn fjallarefur.

Vísnagátan barst sem endranær frá Páli Jónssyni í Hlíð:

Sögn í spilum algeng er,

undir tertubitann fer,

hann í sundur heyið sker,

hátt í lofti damlar sér.

Guðrún Bjarnadóttir ratar á lausnina:

Spaða í bridge fram ber.

Má borða af tertuspaða?

Með heyspaðann skýst og sker,

en sko, þyrluspaðar laða!

Lausnarorðið er spaði. Knútur Haukstein Ólafsson veit það vel:

Spaði sögn í spilum er,

spaði undir tertuna fer,

heyspaðinn lengi hentaði mér,

á hreyfli flugvélar spaði er.

Helgi Einarsson fór úr sauðburði í að að leysa gátuna:

Sögn í spilum spaði er.

Spaði á veisluborðið fer.

Í hlöðum spaði víðast var.

Á vindmyllum brátt hér og þar.

Svona yrkir Helgi Jensson:

Fjórir spaðar geimin gera,

gylltir spaðar tertum hjá,

hvassir spaðar heyið skera,

hreyfast spaðar flugvél á.

Þá Skúli Pálsson:

Í vist og bridds er spaði spil,

spaði köku færir til,

stunguspaði stingur oft,

stóra spaða ber við loft.

Þá er það vísnagáta Páls fyrir næstu viku:

Flokksins merki fuglinn er,

flónskur líka nafnið ber.

Með greini er hann gamalt blað,

en gátan skánar lítt við það.

Bjarni Jónsson er búinn að átta sig á gildi veðurfræðinga:

Núna birtist nýjabrum á trjánum
nær allir sáu fyrir slydduhret.
Þá brosti Katrín Agla björt á skjánum
og brunakulda sneri í hitamet.