Vilja þjóðarleikvang í Víðidalnum

„Ég byrjaði í hestamennsku sem barn og heillaðist strax af þeirri stórkostlegu skepnu sem hesturinn er,“ segir Hlíf Sturludóttir sem á dögunum var kjörin formaður hestamannafélagsins Fáks í Reykjavík. „Sambandið sem myndast við hestana er magnað og það gagnkvæma traust sem þarf að vera fyrir hendi. Frelsið við að þjóta um á hestbaki heillar mig líka. Ég sameinast hestinum sem ég ríð og get sjaldnast spjallað mikið þegar ég er á hestbaki. Hestamennskan er hugleiðslan mín og sálarhvíld. Ég verð alveg ómöguleg ef ég af einhverjum ástæðum get ekki riðið út.“

Atvinnumenn og öflugt fræðslustarf

Um 1.800 manns eru í Fáki, sem er eitt stærsta og öflugasta hestamannafélag landsins. Félagssvæðið er Víðidalur í Reykavík; þar eru tugir hesthúsa, reiðhöll, keppnisvellir og fleira sem skapar starfinu góða umgjörð.

„Fákur er ríkt félag þegar litið er bæði til fólks og hestakosts. Atvinnumenn í hestamennsku sem eru innan okkar raða skila miklu til félagsstarfsins. Þeir eru óþrjótandi uppspretta þekkingar og visku sem hinn almenni félagsmaður býr að og getur leitað í. Það er til dæmis mjög öflugt fræðslustarf í félaginu og þar á sá hópur atvinnumanna sem hefur sinnt þeim hluta félagsstarfsins mikla þökk skilið,“ segir Hlíf, sem hefur verið félagi í Fáki síðastliðin tíu ár eða svo. Hún var gjaldkeri félagsins á árunum 2019-2023 og segist þekkja innviði þess vel frá þeim tíma; hvar veikleikarnir liggja og styrkurinn sé. Hún hafi því ákveðið að taka slaginn þegar farið var að leita eftir nýjum formanni í félaginu.

Vil fara í framkvæmdir

„Ég hef áhuga á að láta gott af mér leiða og sé tækifæri til að gera það með formennsku í Fáki. Ég hef sterkar skoðanir á því hvað er gert og hvernig. Ég er ekki mikið fyrir að sitja og tuða yfir hlutunum heldur vil ég ganga í málin og fara í framkvæmdir og annað sem þarf,“ segir Hlíf og heldur áfram:

„Við höfum dregist aftur úr hinum hestamannafélögunum á höfuðborgarsvæðinu hvað varðar sköpun inniaðstöðu til iðkunar íþróttarinnar. Það er mikil eftirspurn eftir námskeiðum og eftir aðstöðu til sjúkraþjálfunar fatlaðra. Reiðhöllin okkar hér í Víðidalnum er margsprungin og við þurfum að setja byggingu reiðhalla eða reiðskemma á athafnasvæði Fáks á dagskrá og til framkvæmdar. Við höfum einnig áhuga á að byggja þjóðarleikvang íslenska hestsins á Víðidalssvæðinu, sem er yfirbyggður löglegur keppnisvöllur með stúku. Slíkt mannvirki yrði lyftistöng fyrir hestamennsku á öllu landinu.“

Víðidalur er í útjaðri borgarinnar hvaðan er stutt inn á góðar reiðleiðir um óbyggð svæði, svo sem á austurheiðum og í Heiðmörk. Um þessar slóðir er reiðvegakerfi sem Hlíf segir mikilvægt að verja. Þar sé sótt að úr öllum áttum og sumum utanaðkomandi þyki ekki tiltökumál að malbika reiðstígana, svo afleitt sem það er fyrir hross og knapa að tapa mjúkum moldarblöndnum brautum.

Reiðvegakerfið er þjóðararfur

„Reiðvegakerfið okkar er þjóðararfur og menningarverðmæti sem væri synd að glutra niður í hugsunarleysi við framkvæmdir eða skipulagshönnun. Það er ekki svo ýkja langt síðan allar götur í Reykjavík voru reiðgötur. Það er einstakt á heimsvísu að hægt sé að leggja á hest í Reykjavík og ríða honum til dæmis norður í land á reiðvegakerfi landsins sem hefur byggst upp í aldanna rás. Á dagskrá er tvöföldun Suðurlandsvegar og Breiðholtsbrautar sem eru mikilvæg samgöngumannvirki. Þar er afar mikilvægt fyrir Fák að vel takist til við hönnun reiðleiða. Þar hef ég strax komið inn í vinnuna og við erum í góðu og mikilvægu samtali við Reykjavíkurborg, Vegagerðina og hönnuði um hönnun þessara mannvirkja og reiðleiða,“ segir Hlíf og heldur áfram:

„Ég hef einnig áhuga á að koma athafnasvæði Fáks í Almannadal á Hólmsheiði í betra horf. Fara þar í uppbyggingu í samræmi við deiliskipulag svæðisins, það er undir hesthúsabyggð. Um þetta svæði hef ég átt gott samtal við Reykjavíkurborg, sem ég trúi að standi þétt við bakið á okkur varðandi frekari framþróun svæðisins.“

Keppnissport sumarsins snýst um HM

Þótt framkvæmdir á félagssvæði séu mikilvægar er rétt að víkja aðeins að hestamennskunni sjálfri, því ævintýri að fara á bak góðum hesti og spretta úr spori. Þetta er sport tuga þúsunda Íslendinga og stór hluti af menningu þjóðar. Grunnurinn að þessu öllu er auðvitað lagður í æskulýðsstarfinu, sem á vettvangi Fáks er afar öflugt. Markmiðið þar ætti, segir Hlíf, að vera að félagið fái æskulýðsbikarinn á næsta landsþingi Landssambands hestamanna.

„Við viljum heyra hvað krakkarnir hafa sjálfir fram að færa en þau eru með fullt af hugmyndum um hvernig hægt er að efla starfið enn frekar,“ segir Hlíf sem fylgist vel með öllu sem er að gerast í hestmennskunni. Hún segir að í keppnissportinu muni starfið framan af sumri mikið til snúast um HM íslenska hestsins 2025 sem í sumar verður haldið í Sviss.

„Fákur heldur stærsta íþróttamót heims, Reykjavíkurmeistaramótið, núna í júní. Þar verða allir sem stefna á að eiga möguleika á landsliðssæti fyrir HM. Mótið verður alger veisla fyrir þá sem hafa áhuga á að horfa á góða gæðinga,“ segir Hlíf og að síðustu:

Á leið í sleppitúr

„Ég fer í hesthúsið á hverjum degi og ég reyni að ríða út ef veður leyfir. Stundum er bara nóg að finna lyktina og hreinsa skítinn. Mér finnst alveg nauðsynlegt að hitta þessa félaga mína daglega, þótt við ríðum ekki út. Með mínu fólki er stefnan sett á stóran sleppitúr núna í júní um Landbrot og Meðalland. Við munum ríða um Vestur-Skaftafellssýsluna og ég hlakka mikið til. Í júlí förum við með góðum hópi í ferð um Borgarfjörðinn. Við ríðum Hvítársíðuna, umhverfis Strút og endum í Þverárhlíð. Svo verða örugglega farnar einhverjar minni ferðir sem eru minna skipulagðar.“

Hver er hún?

Hlíf Sturludóttir fæddist í Reykjavík árið 1968. Hún er stúdent frá Verslunarskóla Íslands og með gráðu í viðskiptafræði frá Háskóla Íslands. Hún útskrifaðist með MBA-gráðu frá Edinborgarháskóla árið 2000.

Hlíf er einnig útskrifaður reiðmaður frá Landbúnaðarháskóla Íslands á Hvanneyri. Starfar sjálfstætt á sviði fjárfestinga og hefur setið í stjórnum félaga.