Harvard-háskóli kærði í gær Bandaríkjastjórn vegna ákvörðunar hennar í fyrradag um að afturkalla leyfi háskólans til þess að skrá erlenda ríkisborgara til náms við skólann. Samþykkti settur alríkisdómari í málinu að setja tímabundið bann á aðgerðir stjórnvalda á meðan málið væri fyrir dómi.
Kristi Noem heimavarnarráðherra tilkynnti í fyrrakvöld að hún hefði afturkallað heimildir Harvard-háskóla til þess að fá aðgang að gagnabanka stjórnvalda um erlenda námsmenn, en slíkt jafngildir banni á að innrita nýnema, auk þess sem óvíst var hvort erlendir nemendur sem þegar eru við nám í Harvard gætu haldið áfram námi við skólann.
Sagði Noem að ákvörðunin væri tekin þar sem háskólinn hefði ýtt undir ofbeldi og gyðingahatur, auk þess sem hann hefði átt í samstarfi við kínverska kommúnistaflokkinn.
Um 6.800 erlendir nemendur stunda nú nám við Harvard, en það eru um 27% af nemendum skólans. Sagði skólinn í kæru sinni að Bandaríkjastjórn hefði reynt með einu pennastriki að þurrka út um fjórðung af nemendum skólans, fólk sem legði mikið til háskólans og starfs hans. Alan Garber rektor Harvard-háskóla fordæmdi jafnframt aðgerðir Bandaríkjastjórnar og sagði þær vera bæði ólöglegar og án nokkurrar ástæðu. Sagði Garber að ákvörðun Noem mætti rekja til þess að skólinn hefði hafnað kröfum stjórnvalda um að fá að ráða því hvað væri kennt við háskólann og hverjir mættu starfa og nema þar.
Vísaði hann þar til bréfs sem stjórnvöld sendu í apríl en þar var skólinn m.a. krafinn um breytingar á yfirstjórn háskólans, ráðningarstefnu og því hvernig stúdentar væru samþykktir til náms við skólann.
Til baka
Leita í greinasafni
Prenta grein