Fasteignafélagið Kaldalón hefur breytt og þróað fjárfestingastefnu sína. Nú er sjónum einnig beint að innviðafjárfestingum en mikið hefur verið um það fjallað að undanförnu að vöntun er á fjárfestingum í uppbyggingu innviða.
„Við tókum ákvörðun um að skoða fjárfestingar í innviðum. Það eru margar vísbendingar um að þar séu mikil tækifæri – bæði vegna vanfjárfestingar og uppsafnaðrar viðhaldsþarfar,“ segir Jón Þór Gunnarsson forstjóri Kaldalóns í samtali við ViðskiptaMoggann.
Jón Þór segir tímabært að umræða um svokölluð PPP-verkefni fái að þróast en það eru samstarfsverkefni opinberra og einkaaðila í þágu almennings og samfélags.
„Ef svona verkefni eiga að virka, þá þarf sá sem byggir að bera ábyrgð á rekstri og gæðum. Í sumum tilvikum þarf svo eignarhald að færast yfir til hins opinbera að loknum samningstíma,“ segir hann.
Slíkur samstarfsvettvangur gæti dregið úr álagi á opinbera aðila og tryggt betri nýtingu fjármuna. Jón Þór telur að þessi umræða sé loks að þroskast á Íslandi og að hún muni halda áfram að þróast á næstu misserum.
Hann segir að Kaldalón hafi getu til að taka þátt í slíkum verkefnum, hvort sem um sé að ræða skólahúsnæði, fráveitu eða annars konar mannvirki. Félagið leiti stöðugt að nýjum fjárfestingarkostum.
Til baka
Leita í greinasafni
Prenta grein