Gæti reynst erfitt í framkvæmd

Áform um breytingar á kílómetragjaldi valda talsverðum ­áhyggjum hjá Samtökum verslunar og þjónustu (SVÞ) hvað varðar áhrif á erlendar bifreiðir. Í umsögn sinni um frumvarpið telur SVÞ að skattlagning á erlend ökutæki kunni að stangast á við tilskipun Evrópuþingsins.

Í tilskipuninni segir að ökutæki sem skráð eru í aðildarríkjum skuli einungis krafin um gjöld sem um getur í skráningarríkinu.

Benedikt S. Benediktsson, framkvæmdastjóri SVÞ, segir frumvarpið boða flókið kerfi sem gæti reynst mjög erfitt í framkvæmd, sérstaklega fyrir erlend farartæki sem hingað koma með Norrænu. Segir hann breytingarnar bitna mest á fyrirtækjum sem flytja vörur til landsins með skipinu.

„Við sjáum fyrir okkur að gríðarleg flækja geti fylgt breytingum á kílómetragjaldi. Fyrirtæki með tugi eða jafnvel hundruð ökutækja og eftirvagna þurfa að halda nákvæma skrá yfir ekna kílómetra, bæði við komu og brottför ökutækjanna. Þetta er miklu flóknara í framkvæmd en virðist við fyrstu sýn,“ segir Benedikt.

Í frumvarpinu segir að ökutæki undir 10 tonnum greiði daggjald miðað við þyngd og lengd dvalar. Ökutæki sem eru þyngri en 10 tonn greiða gjald út frá eknum kíló­metrum líkt og íslenskar bifreiðir munu gera.

Benedikt veltir því fyrir sér hvort skattlagning á erlend ökutæki sé því lögmæt. Frumvarpið þurfi að taka tillit til reglugerða og flækjustigs skráningar kílómetragjalds erlendra ökutækja til yfirvalda.