Ósamræmi muni bitna á nemendum

Ef ekki er stuðst við samræmd próf við innritun í framhaldsskóla og ekki er eðlilegt samræmi í námsmati milli grunnskóla eru líkur til þess að umsækjendur um skólavist í framhaldsskólum standi ekki jafnir að vígi, í andstöðu við lög og góða stjórnsýsluhætti. Þetta er meðal þess sem kemur fram í lögfræðiáliti sem lögmannsstofan Juris vann að beiðni Viðskiptaráðs Íslands.

Björn Brynjúlfur Björnsson framkvæmdastjóri Viðskiptaráðs segir í Dagmálaþætti mbl.is að lögfræðiálitið hafi verið sent umboðsmanni Alþingis og að fullt tilefni sé fyrir umboðsmann að hefja rannsókn á málinu og kalla eftir svörum frá ráðuneytinu um það hvernig eigi að bregðast við álitinu, sem sýni fram á slæma stöðu.

Guðmundur Ingi Kristinsson, mennta- og barnamálaráðherra, hefur lagt fram frumvarp til breytingar á lögum um framhaldsskóla. Meðal þess sem kemur fram í frumvarpinu er að heimilt verði við innritun í framhaldsskóla að líta í frekari mæli til annarra sjónarmiða en námsárangurs, meðal annars sjónarmiða sem tengist skólasamfélagi viðkomandi skóla, meðal annars til þess að auka fjölbreytni í nemendahópnum.

Bent er á það í álitinu að ákvæði frumvarpsins um það hvaða þátta skuli líta til við innritun í framhaldsskóla séu afar rúm að efni til og því sé ekki fullnægt þeim kröfum sem leiða af sjónarmiðum laga um það þegar stjórnvöld úthluta takmörkuðum gæðum. Að lokum er tekið fram í álitinu að frumvarp mennta- og barnamálaráðherra felur aðeins í sér heimild til þess að líta til annarra sjónarmiða en námsárangurs við innritun í framhaldsskóla. Því sé ekkert því til fyrirstöðu að einstakir skólar líti áfram aðeins til námsárangurs.