Búist við breytingum á frumvarpi

Allsherjar- og menntamálanefnd mun leggja fram breytingatillögur við frumvarp Guðmundar Inga Kristinssonar, mennta- og barnamálaráherra, um breytingar á lögum um framhaldsskóla, að sögn Víðis Reynissonar, formanns nefndarinnar.

„Þetta er búið að vera til umfjöllunar og við höfum fengið fjölmarga gesti, meðal annars Viðskiptaráð, og margar umsagnir bárust,“ segir Víðir og bætir við að breytingarnar verði ekki endilega á þeim þáttum sem fram komu í lögfræðiáliti Viðskiptaráðs og Lögmannsstofunnar Juris sem birt var í gær og greint frá í Morgunblaðinu.

Skoða agamálin

„Við erum að skoða 14. grein frumvarpsins sérstaklega, þar sem verið er að fjalla um agamálin, þar sem tekið er á skyldu nemenda að hlýða fyrirmælum og að starfsemi nemendafélaganna falli undir þetta,“ segir Víðir.

Meðal þess sem kemur fram í frumvarpi Guðmundar Inga er að heimilt verði að líta í meiri mæli til annarra þátta en námsárangurs við innritun í framhaldsskóla.

„Skólar voru að nýta sér reglugerðarheimild til að horfa til annarra þátta en námsárangurs, eins og til dæmis kynjakvóta. Álit umboðsmanns Alþingis var að skólarnir þyrftu lagaheimild til að gera þetta. Með þessu frumvarpi er í raun verið að lögfesta verklag sem hefur verið viðhaldið í mjög mörgum skólum,“ segir Víðir.

Í áliti Viðskiptaráðs Íslands og Juris kemur fram að ef hvorki samræmd próf verði lögð fyrir né virkt eftirlit haft með samræmdu námsmati milli grunnskóla standi nemendur ekki jafnir að vígi við inntöku í framhaldsskóla. Það sé í andstöðu við jafnræðisreglu stjórnarskrárinnar.

„Skoðanir um þetta hafa verið skiptar. Margir sérfræðingar sem við höfum fengið til okkar í vetur telja að samræmd próf séu ekki skynsamleg en aðrir, eins og Viðskiptaráð, telja þau skynsamleg,“ bætir Víðir við.