Veðrið andstyggð og fuglum hætt

„Rjúpan mun pluma sig þrátt fyrir hret, en ég hef áhyggjur af afdrifum mófugla. Þeir munu fara illa út úr þessu andstyggilega veðri,“ segir Ólafur K. Nielsen fuglafræðingur. Hann var í gær á Skútustöðum við Mývatn þar sem var krapahríð og ekki hundi út sigandi. Hret sem nú gengur yfir norðurhluta landsins mun hafa áhrif á margt í lífríkinu, sbr. þær búsifjar sem urðu í hvellinum fyrstu vikuna í júní í fyrra. Ólafur bendir þó á að þá hafi þykkur snjór legið yfir öllu landi ofan 100 m hæðarlínu. Nú sé staðan önnur og skárri, samanber að við Mývatn var í gær aðeins grátt í rót þótt slydduhríð væri áköf. Fyrir réttu ári var þar allt á kafi í snjó. Jafnframt gera spár ráð fyrir að hretið vari í aðeins tvo daga en ekki í fimm daga líkt og var í fyrra.

Fuglar sem gætu farið illa út úr veðrinu nú eru, að sögn Ólafs, til dæmis hrossagaukur, stelkur, spói, jaðrakan, lóuþræll, þúfutittlingur og skógarþröstur. Þessir fuglar liggja núna á eggjum eða eru með litla unga.

„Fálkinn stendur svona veður af sér nema þá helst ungar í hreiðrum sem eru óvarin gegn norðanátt. Þeir geta króknað og slíkt gerðist í júníhretinu í fyrra. Sama er að segja um rjúpuna, hún er norrænn fugl og ræður við svona aðstæður. Í fyrra afræktu rjúpurnar reyndar í stórum stíl hreiðrin í júníhretinu en margar þeirra urpu aftur og afkoma stofnsins í lok sumars var góð líkt og mátti sjá á rjúpnamergðinni sem mætti í varplöndin í vor.“

Bændur í Þingeyjarsýslum sem Morgunblaðið ræddi við í gær bera sig nokkuð vel þrátt fyrir hretið nú. Þeir benda á að hretið nú sé að mestu slydda og snjó á þíðri jörðu muni því fljótt taka upp. Gróður nú hafi verið kominn vel á veg, mun lengra en í hretinu fyrir ári. Þar megi þakka blíðviðrinu í síðari hluta maí. Lambfé nú hafi líka víðast hvar enn verið í heimatúnum og því auðvelt að koma öllu í skjól. » 10