Strandveiðar í ólgusjó

Linnulausar yfirlýsingar um að nú sé tekin við „verkstjórn“ eins og þær kalla sig valkyrjurnar endurspeglast í engu í skipulagi þingstarfa eða framvindu mála.

Stjórnin hefur lagt fram 78 lagafrumvörp, sum bíða enn fyrstu umræðu þegar þetta er skrifað, jafn ótrúlegt og það nú er. Af þessum 78 hafa 14 orðið að lögum. 18%! Þegar sex þingfundadagar eru eftir af starfsáætlun þingsins. Það er nú öll verkstjórnin.

Mesta furðuverk þessa þings birtist á vef Alþingis í liðinni viku og var tekið til fyrstu umræðu í gær. Það fjallar um stjórn fiskveiða og hverfist um sérreglur vegna strandveiða.

Í mjög stuttu máli má segja að þarna séu uppi áform stjórnvalda um að kippa veiðiráðgjöf Hafrannsóknastofnunar úr sambandi og banna Fiskistofu að framkvæma sitt lögbundna hlutverk, sem er að stöðva veiðar þegar kvóti er búinn.

Innri mein stjórnarflokka komu strax í ljós, en í frumvarpinu stendur meðal annars: „Til að unnt sé að tryggja 48 veiðidaga kann að þurfa að gera breytingu á því magni sem heimilt er að veiða í hverri veiðiferð.“

Þingmenn Flokks fólksins, sem eiga sæti í atvinnuveganefnd, hrukku hið snarasta af hjörunum. Annar þeirra kallaði þetta „mistök“ í texta greinargerðar. Formaður nefndarinnar, Sigurjón Þórðarson, sagði þetta hafa verið skoðað í ráðuneytinu, niðurstaða ríkisstjórnarinnar hefði verið að „grípa alls ekki til þessarar lausnar“, og hélt áfram að „þetta hafi bara óvart haldist inni í greinargerðinni“.

Við umræðuna í gær sagði atvinnuvegaráðherra að þetta væri ein af leiðunum, þ.e. það að minnka daglegan hámarksafla, sem eðlilegt væri að skoða. Þar kom það.

Formaður atvinnuveganefndar hélt því fram í umræðunni að hún væri drifin áfram af andstöðu við strandveiðar. Svo er ekki. Það er bara enginn ábyrgur stjórnmálaflokkur tilbúinn að margfalda umfang þessara veiða án þess að atvinnuvegaráðherra upplýsi hvaðan ætlunin er að taka þann kvóta.

Það trúir því nefnilega enginn að það séu raunverulega áform uppi um að draga þann afla sem fer umfram 10 þúsund tonnin þetta árið af strandveiðikvóta næstu þriggja ára.

Af hverju trúir því enginn? Jú, það er vegna þess að í frumvarpinu stendur að áform séu uppi um að leggja fram frumvarp á næsta löggjafarþingi til að ramma inn nauðsynleg viðbrögð við reynslunni af þessu strandveiðitímabili.

Þetta getur varla þýtt annað en að áform séu um að eiga við reglur hins svokallaða 5,3% potts, sem er hinn félagslegi pottur kvótakerfisins.

Verður átt við almenna byggðakvótann eða hinn sértæka? Verður línuívilnunin lækkuð? Verða skelbæturnar afnumdar?

Þetta eru spurningar sem atvinnuvegaráðherra verður að svara áður en til greina kemur að samþykkja það mál sem mælt var fyrir í gær.