„Sóun á almannafé skattgreiðenda“

Skýr svör vantar frá ríkisstjórn um það hversu lengi skattgreiðendur þurfa að borga fyrir afnot af tómum húsum á vegum Vinnumálastofnunar.

Þetta segir Vilhjálmur Árnason þingmaður Sjálfstæðisflokksins, en hann lagði fram fyrirspurn til Ingu Sæland húsnæðisráðherra um fasteignir sem Vinnumálastofnun hefur á leigu fyrir umsækjendur um alþjóðlega vernd.

„Ég lagði fram þessa fyrirspurn til ráðherra vegna þess að ég var orðinn var við að þar sem umsækjendur um alþjóðlega vernd hefðu verið stæðu húsin bara tóm,“ segir Vilhjálmur í samtali við Morgunblaðið. „Ég fékk veður af því að ástæða þess að húsin stæðu tóm væri að Vinnumálastofnun væri enn með gilda fasteignasamninga,“ bætir hann við.

Í svari ráðuneytisins kemur fram að Vinnumálastofnun hefur 37 eignir og 93 hótelherbergi á leigu fyrir umsækjendur. Einnig kom fram að 571 umsækjandi dvaldi í eigum á vegum stofnunarinnar 1. maí síðastliðinn og að meðaldvalartími umsækjenda í úrræðunum væri um 112 dagar.

Mikið álag á Reykjanesbæ

Vilhjálmur vekur athygli á því hve mikið af því húsnæði sem er á leigu er í Reykjanesbæ. Þann 1. maí síðastliðinn dvöldu 246 umsækjendur í búsetuúrræðum í Reykjanesbæ en aðeins 138 í Reykjavík, að því er fram kemur í svari ráðuneytisins.

„Þarna búa um 20 þúsund manns í Reykjanesbæ, og þar er nánast helmingur af úrræðunum á meðan hátt í 150 þúsund búa í Reykjavík og þar eru bara nokkur,“ segir Vilhjálmur. „Mér fannst svörin draga fram hversu mikið álag var sett á eitt samfélag umfram önnur, sem mér finnst vera mjög alvarlegt mál,“ bætir hann við.

Í svarinu kemur fram að tíu eignir á vegum stofnunarinnar hafa verið ónotaðar í nokkurn tíma. Þrjár þessara eigna hafa staðið tómar síðan í lok síðasta árs.

Vilhjálmi fannst vanta skýr svör frá ráðherra um lengd þessara leigusamninga. „Það kom ekki fram í svarinu hversu langt er eftir af þeim leigusamningum sem enn eru í gildi,“ segir hann.

Slæm áhrif á nærumhverfið

Vilhjálmur segir að þetta sé ekki einungis „sóun á almannafé skattgreiðenda,“ heldur hafi þetta líka slæm áhrif á nærumhverfi þeirra fasteigna sem tómar standa. „Á meðan eru þessi hús ekki nýtt fyrir þá sem vantar húsnæði eða til útleigu fyrir gistingu.“

„Þarna eru kannski heilu hverfin sem fá ekki ferðamenn inn í hverfið til þess að versla í bakaríinu, búðinni, sjoppunni eða veitingastaðnum. Því þarna eru bara gistiheimili sem eiga að skaffa þeim kúnna lokuð,“ bætir hann
við.

Vilhjálmur segist vera ánægður að sjá fækkunina á umsækjendum.

„Mér fannst svörin draga fram hvað þörfin fyrir húsnæðið hefur dregist saman og fækkun á þeim sem þurfa að nýta sér úrræði stofnunarinnar er mjög jákvæð. Hagræðing er í því og það sýnir að fyrri stjórnvöld hafi skilað góðum árangri,“ bætir hann við í lokin.