Fjölgun er mætt með framkvæmdum

Fyrstu skóflustungur að tveggja herbergja parhúsi, sem Bríet – leigufélag lætur byggja, voru teknar nú fyrr í vikunni. Það gerðu Bjarki Þorsteinsson sveitarstjóri Dalabyggðar og Iða Marsibil Jónsdóttir framkvæmdastjóri Bríetar. Þarna verða undir einu þaki tvær íbúðir, hvor þeirra um sig 63 m², íbúðirnar samanstanda af alrými, tveimur svefnherbergjum, baðherbergi og forstofu. Vonir eru bundnar við að verkinu ljúki í júlí og íbúðirnar, sem eru í húsi við Borgarbraut, verði tilbúnar til afhendingar væntanlegum leigjendum fyrir lok sumars.

Bjarki Þorsteinsson segir það gríðarlega mikilvægt fyrir Dalabyggð að fá verkefnið í gang. „Húsnæðismarkaðurinn er þannig að það vantar bæði eignir til kaups og leigu og ef skoðaður er fasteignavefur á miðlunum þá er ekkert hús eða íbúð til sölu í Búðardal núna. Okkur er að fjölga, íbúatalan stendur í 679 núna 1. júní sl. og hefur verið fjölgun það sem af er ári. Fólk hefur áhuga á Dölunum og því sem er að gerast hér. Þeim áhuga er svarað til að mynda með verkefni sem þessu,“ segir sveitarstjórinn.

Sveitarfélagið Dalabyggð eignaðist 1,54% í formi hlutafjár í leigufélaginu Bríet 2023 þegar leigufélagið eignaðist eignir sveitarfélagsins við Stekkjarhvamm og Gunnarsbraut. Bríet býður fjölbreytta húsnæðiskosti úti um allt land og telur eignasafn félagsins um 500 fasteignir sem eru í 45 sveitarfélögum hringinn um landið.