Gróður Lúpínan breiðir hraðar úr sér þar sem úrkoma er mikil.
Gróður Lúpínan breiðir hraðar úr sér þar sem úrkoma er mikil. — Morgunblaðið/Eyþór
Hreinn Óskarsson, sviðsstjóri hjá Landi og skógi, segir útlit fyrir að lúpínan eigi ekki eftir að hafa það gott í sumar. „Það er búið að vera svo mikið rok að blómin hafa sjálfsagt orðið fyrir einhverjum skaða og eiga erfiðara með að mynda fræ,“ segir Hreinn í samtali við Morgunblaðið

Valgerður Birna Magnúsdóttir

vala@mbl.is

Hreinn Óskarsson, sviðsstjóri hjá Landi og skógi, segir útlit fyrir að lúpínan eigi ekki eftir að hafa það gott í sumar. „Það er búið að vera svo mikið rok að blómin hafa sjálfsagt orðið fyrir einhverjum skaða og eiga erfiðara með að mynda fræ,“ segir Hreinn í samtali við Morgunblaðið.

Hann segir lúpínubreiðurnar hafa þurft að berjast gegn vindi og það hafi áhrif á fræmyndun. „Humlurnar eru ekki mikið á sveimi í slíku veðri, svo að blómin frjóvgast síður.“

Hreinn segir lúpínuna hafa hopað sums staðar á landinu, sérstaklega þar sem hún sé búin að vera lengi. „Það er ýmislegt sem fær hana til að hopa, til dæmis lirfurnar sem nærast á henni og éta hana hreinlega upp – mófetar, ertuyglur og skógbursti, svo nokkur dæmi séu nefnd.“ Þurrkatímabil hafa einnig sitt að segja. „Lúpínan heldur þó áfram að breiðast út á rýrt land, sanda og land sem hefur litla gróðurhulu, en það gerist frekar í bleytusumrum.“

Hann segir lúpínuna breiðast hraðar út á stöðum þar sem mikil úrkoma er og það lýsi sér til dæmis í því að lúpínan sé hærri og þéttari meðfram ströndum landsins. Lúpínan hopi hins vegar hratt á Norðurlandi og aðrar ágengar jurtir séu að taka yfir.

Lúpína hefur nýst bændum til landgræðslu undanfarin ár, til að mynda í kringum Gunnarsholt á Suðurlandi. Þar hafði lúpínu verið sáð í örfoka land þar sem nú eru um 100 hektarar af kornökrum. „Lúpínan breytir landinu úr sandi yfir í nytjaland – hún er ekki alls staðar til bölvunar,“ segir Hreinn.

Höf.: Valgerður Birna Magnúsdóttir