Lækka álagningu á móti hækkunum

Almar Guðmundsson bæjarstjóri Garðabæjar og Bragi Bjarnason sveitarstjóri Árborgar stefna báðir að lækkun álagningar fasteignagjalda í kjölfar nýs fasteignamats.

Í lok maí var birt nýtt fasteignamat fyrir árið 2026. Matið sýnir að meðaltali 9,2% hækkun á milli ára. Mesta hækkunin er á Suðurnesjum og Norðurlandi. Í fyrsta sinn frá árinu 2007 er fasteignamat orðið hærra en brunabótamat.

Almar Guðmundsson segir Garðabæ stefna að því að lækka fasteignagjöld í samræmi við hækkunina eins og bærinn hafi gert undanfarin ár. Hann segist vilja tryggja að hækkunin velti ekki yfir á íbúa bæjarins.

Almar kallar einnig eftir breytingum á álagningu fasteignaskatta. Hann furðar sig á mismunandi hækkun fasteignamats á milli svæða í bænum og segir bæði skynsemi og gagnsæi fyrir íbúa vanta í ferlinu.

Bragi segir hækkunina mikið gleðiefni. Hann segir að næstu skref sveitarfélagsins séu að lækka fasteignagjöldin sem hafa verið há sökum mikilla framkvæmda á svæðinu. Hann bætir þó við að uppbyggingunni sé hvergi nærri lokið.

Sveitarstjórar Borgarbyggðar, Ísafjarðar, Múlaþings, Skagafjarðar, Suðurnesjabæjar og Voga segja enga ákvörðun hafa verið tekna varðandi breytingar á álagningu fasteignagjalda en fagna hækkandi fasteignamati á landsbyggðinni.

Einar Þorsteinsson lagði fram tillögu á borgarráðsfundi í gær um lækkun álagningar fasteignagjalda. Hann telur Reykjavíkurborg hafa skapað nægan rekstrarafgang og hafa því tök á að lækka álagninguna. Hann segir spennandi að sjá hvort vinstri meirihlutinn sé tilbúinn að samþykkja tillöguna eða hvort hann ætli að „láta borgarbúa borga brúsann“.