Starfsáætlun Alþingis felld úr gildi

Starfsáætlun Alþingis var felld úr gildi undir kvöldmat í gær, svo að óvíst er hvenær þinglok verða. Þingfundur stóð fram á kvöld í gær og boðað hefur verið til þingfundar í dag.

Forseti Alþingis átti fund með forsætisnefnd og formönnum þingflokka síðdegis í gær, en þar var þeim gerð grein fyrir því að „starfsáætlun þingsins [hefði] verið tekin úr sambandi“. Í því felst að forseti hefur heimild til að fjölga þingfundardögum og getur lengt þingfundi eftir þörfum.

Samkvæmt starfsáætluninni átti þingfrestun að eiga sér stað næsta föstudag, 13. júní, en af því verður ekki. Hins vegar eiga eldhúsdagsumræður að fara fram samkvæmt fyrri áætlun miðvikudagskvöldið 11. júní í næstu viku, svo að líklega gerir stjórnarmeirihlutinn ekki ráð fyrir því að framlengja þinghaldið mikið.

Ekki er hægt að segja að þessi ráðstöfun hafi komið mönnum í opna skjöldu; meirihlutanum hefur gengið brösuglega að þoka helstu málum sínum áfram og kvartað undan „tafaleikjum“ stjórnarandstöðunnar.

Fyrir sitt leyti gaf Þórunn Sveinbjarnardóttir, forseti Alþingis, það til kynna fyrir allnokkru að þinghald gæti staðið fram eftir sumri ef nauðsyn bæri til.

Taugatitringur á þingi

Það var rafmögnuð stemning í þinghúsinu í gær þegar fundur var settur kl. 10.30. Þar hafði Bókun 35 óvænt verið tekin á dagskrá, sem ýmsum kom á óvart í ljósi kvartana stjórnarliðsins um hversu hægt þeim sóttist að koma málum sínum fram.

Bókun 35, sem snýst um innleiðingu forgangsreglu Evrópulöggjafar gagnvart landslögum, er umfangsmikið og umdeilt mál sem varðar fullveldi landsins, en Kristrún Frostadóttir forsætisráðherra sagði við myndun ríkisstjórnarinnar að það mál fengi mikla umræðu.

Óljóst er því hvers vegna hún var tekin á dagskrá, ekki liggur á henni og sú þrætubók flýtir ekki fyrir þingstörfunum. Helst voru menn á því að hún væri ögrun, að meirihlutinn vildi láta í það skína að hann hefði nægan tíma í sín mál.

Reglan er þó sú að stjórnarandstaðan hefur alltaf meiri tíma en stjórnarmeirihlutinn og svartur á alltaf leik.

Það sást vel strax í umræðum um störf þingsins og síðan um fundarstjórn forseta, þar sem stjórnarandstaðan lét engan bilbug á sér finna og fagnaði því raunar að Bókun 35 kæmi til umræðu, en stjórnarliðar höfðu líka margt til mála að leggja um áherslumál sín. Þar var mikið talað, svo mikið að eiginleg dagskrá gat ekki hafist fyrr en upp úr hádegi.

Hægt miðaði áfram

Umræðuefnin fram að hádegi voru þó alls ekki innantómt fjas eða tilraun til tímaeyðslu. Þar var meðal annars talsvert rætt um fiskveiðiráðgjöf Hafró, sem út kom þá um morguninn, en í henni fólst talsverð lækkun á veiðiheimildum og er útlitið næstu ár raunar ekki bjartara.

Það mun augljóslega hafa efnahagslegar afleiðingar, en eins var á það bent að þau ótíðindi hefðu sitt að segja um áformaða hækkun veiðigjalda, en þó kannski ekki síður fyrirhugaða lagabreytingu um stórauknar strandveiðar. Ekki síst þá í ljósi þess að ráðgjafar Hafró var ekki leitað við þá frumvarpssmíð, en stofnunin varar við afleiðingum þess.

Loks þegar hin reglulega dagskrá gat hafist, en þar á meðal voru allmargar atkvæðagreiðslur, gekk afgreiðslan hægt, þar sem stjórnarandstæðingar gerðu fjölmargar athugasemdir, en um leið seig brúnin á stjórnarliðum og taugatitringur þeirra var nánast áþreifanlegur.

Jafnvel Þórunn Sveinbjarnardóttir þingforseti gat ekki leynt gremju sinni, og brýndi eitt sinn raustina í hliðarsölum.

Óljóst er hvort betur miðar í dag eða eftir hvítasunnu, en jafnvel þó svo að þingdögum verði fjölgað geta þeir ekki orðið margir. Stjórnarliðið kann því senn að þurfa að velja hverju megi koma í gegn og hvað þurfi að bíða.