Umferðin gekk vel um helgina

Nýliðin er hvítasunnuhelgin en landsmenn grípa þá oft tækifærið til þess að ferðast um landið. Umferðin á landsbyggðinni gekk vel um helgina og fór lítið fyrir umferðarteppum.

Í samtali við Morgunblaðið segir Björgvin Fjeldsted, varðstjóri hjá lögreglunni á Vesturlandi, að nokkuð hafi verið um hraðakstur. Um 40 ökumenn hafi verið teknir fyrir að aka of hratt frá fimmtudegi til mánudags.

Hann nefnir þó að það sé dæmigert fyrir helgar þar sem umferð er mikil. Að öðru leyti hafi helgin gengið slysalaust fyrir sig og engar umferðarteppur myndast, að sögn Björgvins.

Magnús Ragnarsson, varðstjóri lögreglunnar á Suðurlandi, tekur í sama streng og segir helgina hafa gengið mjög vel. Engin alvarleg umferðarslys hafi orðið og ekkert óvenjulegt hafi komið upp á.

Kristófer Hafsteinsson, varðstjóri hjá lögreglunni á Akureyri, segir lögregluna hafa sinnt virku eftirliti um helgina og nefnir hann jafnframt að ökumenn á Norðurlandi hafi almennt verið duglegir að virða hraðatakmarkanir.

Þá hafi engin áberandi umferðarteppa myndast og helgin því gengið afar vel, að sögn Kristófers.