Skógareldar Í Manitoba-fylki í Kanada eru skógareldar tíðir. Eldarnir sem nú loga á svæðinu eru þó fyrr á ferðinni en þeir hafa verið undanfarin ár.
Skógareldar Í Manitoba-fylki í Kanada eru skógareldar tíðir. Eldarnir sem nú loga á svæðinu eru þó fyrr á ferðinni en þeir hafa verið undanfarin ár. — AFP/Ríkisstjórn Manitoba
Þúsundir manna hafa neyðst til að yfirgefa heimili sín vegna mikilla skógarelda sem geisa þessa dagana í Manitoba-fylki í Kanada. Yfirvöld hafa fyrirskipað víðtækar rýmingar í kjölfar eldanna sem teygja sig nú yfir gríðarlega stórt svæði

Björn Diljan Hálfdanarson

bdh@mbl.is

Þúsundir manna hafa neyðst til að yfirgefa heimili sín vegna mikilla skógarelda sem geisa þessa dagana í Manitoba-fylki í Kanada. Yfirvöld hafa fyrirskipað víðtækar rýmingar í kjölfar eldanna sem teygja sig nú yfir gríðarlega stórt svæði. Yfirvöld vinna nú að því að ná stjórn á eldunum.

Vilhjálmur Wiium, aðalræðismaður Íslands í Kanada, segir í samtali við Morgunblaðið að eldar af þessari stærðargráðu séu sjaldgæfir í þessum hluta landsins. „Þetta er töluvert meira en hefur verið hér í Manitoba, það eru oft eldar hér en þeir hafa ekki verið svona stórir og svona nálægt byggð,“ segir Vilhjálmur.

„Þetta er líka fyrr en það er vanalega með þessa elda, þeir koma venjulega aðeins seinna á árinu, eða í júlí eða ágúst,“ segir Vilhjálmur en gróðureldar eru afar algengir í Kanada.

18.000 manns á flótta

Eldarnir ná nú yfir afar stórt svæði og margt fólk hefur þurft að flýja. „Þetta eru einhver tuttugu samfélög sem hafa þurft að yfirgefa heimili sín, síðast þegar ég vissi voru þetta um 18.000 manns sem höfðu þurft að fara,“ segir Vilhjálmur.

Kanadísk yfirvöld nýta nú öflugt björgunar- og slökkvilið til að bregðast við ástandinu. Meðal annars eru notaðar svokallaðar vatnsvörpuvélar, eða „water bombers“, sem sækja vatn úr nálægum stöðuvötnum og varpa því yfir eldsvæðin úr lofti.

Rýmingar hafa gengið vel

Vilhjálmur bendir á mikilvægi þess að fólk fari eftir fyrirmælum yfirvalda til að tryggja öryggi sitt og annarra. „Það er gríðarlega mikilvægt að fólk hlýði því sem er sagt, það hefur gengið nokkuð vel hingað til og ég hef ekki heyrt um nein vandamál sem hafa komið upp út af þessu í rýmingunum.“ Í lokin segir Vilhjálmur að rýmingarnar hafi gengið vel og fljótt fyrir sig.

Vestur-Íslendingar óttast

Áhrif eldanna snerta einnig marga af þeim afkomendum Íslendinga sem búa á svæðinu, en þar hafa byggðir Vestur-Íslendinga haldist frá 19. öld. Manitoba er eitt helsta vesturíslenska svæðið í Kanada og er þekkt fyrir tengingu sína við Ísland. Þó að ekki liggi fyrir hvort þessar byggðir séu beint í hættu, þá vekja tíðindi af eldunum áhyggjur í íslensk-kanadísku samfélagi, sem hefur sterkar rætur og tengsl við Ísland.

Höf.: Björn Diljan Hálfdanarson