Fjölmiðlafrumvarp óbreytt úr nefnd

Frumvarp Loga EInarssonar menningarmálaráðherra um breytingar á fjölmiðlalögum tók engum breytingum á vettvangi allsherjar- og menntamálanefndar Alþingis, ef undan er skilin smávægileg tæknileg breyting.

Þar er því áfram lagt til að fyrri ákvæði um styrki til einkarekinna fjölmiðla verði framlengd um eitt ár enn, en með þeirri breytingu að hámarkshlutur af heildarupphæð styrkframlaga ársins verði 22% í stað 25% áður.

Sú breyting hefur aðeins áhrif á tvö útgáfufélög, Árvakur sem gefur út Morgunblaðið, mbl.is og fleiri miðla, og Sýn sem m.a. heldur úti Stöð 2, Bylgjunni og Vísi.

Alls bárust níu umsagnir, þrjár frá minni fjölmiðlum sem fögnuðu því að þeir yrðu áfram styrktir og að hlutfallslega kæmi meira í þeirra hlut.

Bæði Sýn og Árvakur drógu fram í umsögnum sínum að þrátt fyrir að flytja mikið magn frumfrétta fengju útgáfufélögin ekki styrki í neinu hlutfalli við það eða útbreiðslu, heldur ætti enn að skerða hlut þeirra. Í umsögn Sýnar var vikið berum orðum að afleiðingunum:

„Frekari skerðing á opinberum stuðningi nú myndi torvelda enn frekar rekstur sjálfstæðrar fréttastofu Sýnar og draga úr samkeppnishæfni hennar gagnvart ríkismiðlinum.“

Andstaða hagsmunasamtaka

Hagsmunasamtök sendu einnig inn umsagnir sem voru afar gagnrýnar á frumvarpið.

Blaðamannafélagið fagnaði því að styrktartímabilið væri framlengt að svo stöddu, en taldi hins vegar „ótímabært að ráðast í þessa einstöku breytingu á stuðningskerfinu nú til eins árs, sem ljóst er að hefur neikvæðar afleiðingar fyrir tvö fjölmiðlafyrirtæki – en óljóst hver áhrifin kunna að vera á önnur.“

Samtök atvinnulífsins lýstu áhyggjum sínum af því „að lækkun hámarkshlutfalls muni helst bitna á þeim sem síst skyldi, s.s. stærstu miðlunum sem hafa besta möguleika á að veita RÚV raunverulega samkeppni og búa yfir mestum burðum til að veita stjórnvöldum nauðsynlegt aðhald.“

Minnihlutaálit vantar

Athygli vekur að fulltrúar minnihlutans í allsherjar- og menntamálanefnd hafa ekki lagt fram eigið álit á lögunum.

„Við vildum að 25% þakið yrði óbreytt svo þetta virðist ekki beinast beint gegn Árvakri og Sýn,“ sagði Jón Pétur Zimsen, þingmaður Sjálfstæðisflokksins og nefndarmaður, í samtali við blaðið.

Að sínu viti mætti ekki lækka þakið, þó ekki væri nema virðingar Alþingis. Þar vísaði hann til ummæla Sigurjóns Þórðarsonar, þingmanns Flokks fólksins, sem lét í ljós óskir um lægri styrki til fjölmiðla sem sögðu fréttir sem hittu hann eða flokkinn illa fyrir.

Að sögn Jóns Péturs stóð til að samþykkja minnihlutaálit, en Guðrún Hafsteinsdóttir hefði viljað breyta því í frávísunartillögu. Frá henni hefði svo verið fallið þegar bent hefði verið á að hún fæli í sér að enginn miðill nema Ríkisútvarpið fengi styrki næst.