Framkvæmdastjóri Atlantshafsbandalagsins, Mark Rutte, lýsti því yfir í gær að þörf væri á „risastökki“ í sameiginlegri varnargetu bandalagsríkjanna. Þar á meðal sagði Rutte þörf á 400% aukningu í loft- og eldflaugavörnum til þess að verja ríkin gegn Rússlandi.
„Við sjáum í Úkraínu hvernig Rússland veldur ógn úr lofti, þannig að við munum styrkja skjöldinn sem ver himna okkar,“ sagði Rutte í ávarpi sem hann flutti í Chatham House-hugveitunni í Lundúnum.
Leiðtogafundur Atlantshafsbandalagsins fer fram í Haag eftir tvær vikur, en Rutte hefur þrýst á um að þar verði samþykkt nýtt markmið um útgjöld til varnarmála, þannig að bandalagsríkin skuldbindi sig til þess að verja 3,5% af vergri landsframleiðslu til varnarmála fyrir árið 2032 og 1,5% í ýmsa innviði, sem einnig geta nýst til varna.
Rutte sagði í Chatham House í gær að hann gerði ráð fyrir því að tillaga sín yrði samþykkt af öllum bandalagsríkjunum, sem nú eru 32 að tölu. „Þetta verður skuldbinding allra NATO-ríkjanna og vendipunktur fyrir bandalagið,“ sagði Rutte í ávarpi sínu.
Hann varaði jafnframt við að hættan af Rússum myndi ekki líða hjá þó að stríðinu í Úkraínu lyki. Benti Rutte á að Rússar framleiddu nú jafnmikið af skotfærum á þremur mánuðum og bandalagsríkin öll framleiddu á einu ári. Því væri þörf á mun meiri skotfæraframleiðslu, auk þess sem það vantaði brynvarin farartæki og skriðdreka í þúsundatali.
Rússnesk stjórnvöld fordæmdu ræðu Ruttes áður en hún var flutt, og sagði Dmitrí Peskov, talsmaður Pútíns Rússlandsforseta, að Atlantshafsbandalagið væri að sanna að það væri „tól fyrir yfirgang og árekstra“.
Til baka
Leita í greinasafni
Prenta grein