Ósáttir við tafir á leyfisveitingum

„Að mínu viti þarf að tryggja mun sveigjanlegri og vænlegri skilyrði fyrir þau sem vilja hefja veitingarekstur í Reykjavík. Við eigum að fagna slíku framtaki og vera leiðbeinandi og styðjandi en ekki leggja sífellt stein í götu þeirra sem vilja bjóða borgarbúum nýja þjónustu. Mér finnst vanta hugarfarsbreytingu í þetta kerfi allt,“ segir Hildur Björnsdóttir, oddviti Sjálfstæðisflokksins í borgarstjórn Reykjavíkur.

Mikil óánægja er meðal veitingamanna vegna seinagangs við leyfisveitingar í Reykjavík. Óánægjuna má að hluta rekja til nýrrar reglugerðar um hollustuhætti sem gekk í gildi í fyrrasumar en kom til framkvæmda í síðasta mánuði. Í henni felst meðal annars að þegar leyfi hefur verið samþykkt er það sett í kynningu á heimasíðu heilbrigðiseftirlitsins í fjórar vikur þar sem hægt er að gera athugasemdir. Að þeim tíma liðnum geta veitingamenn þurft að bíða í allt að fjórar vikur eftir endanlegri ákvörðun. Þetta hefur seinkað opnun á nokkrum veitingastöðum.

Morgunblaðið greindi á laugardag frá því að eigendur bakarísins Hygge hefðu beðið í 200 daga eftir því að fá rekstrarleyfi á Barónsstíg. Áðurnefndar 4-8 vikur vegna kynningar bættust þar við langt ferli í samskiptum við Heilbrigðiseftirlit Reykjavíkur er sneru að smávægilegum breytingum á staðnum. Samkvæmt upplýsingum blaðsins hafa fleiri staðir þurft að sætta sig við óþarfar tafir á leyfisveitingu af sömu sökum. Þar á meðal eru kaffihús Starbucks og nýr staður sem til stendur að opna þar sem skemmtistaðurinn b5 var áður.

Þá hafa nýir rekstraraðilar á stöðunum Drunk Rabbit og Kastrup sömuleiðis þurft að sæta sömu skilmálum þótt ekkert hafi breyst í rekstri þeirra er snýr að matvælaöryggi. Miklir hagsmunir geta verið í húfi fyrir veitingamenn, bæði vegna launagreiðslna og tapaðra tekna. Í tilfelli Kastrup hafa eigendur 101 hótels tekið staðinn yfir af fyrri eigendum en Kastrup hefur séð um morgunverðarþjónustu og sitthvað fleira fyrir hótelið. Lokað hefur verið á Kastrup síðan staðurinn var innsiglaður í byrjun maí vegna ógreiddrar skattaskuldar.

Eftir þrýsting frá veitingamönnum gerði Jóhann Páll Jóhannsson, umhverfis-, orku- og loftslagsráðherra, breytingar á reglugerðinni fyrir helgi. Þær breytingar koma í veg fyrir að fara þurfi í þetta langa auglýsingaferli þegar skipt er um eigendur á veitingastöðum og reksturinn helst óbreyttur.

Hildur segir að veitingamenn hafi um árabil kvartað undan seinagangi og dræmum leiðbeiningum frá Heilbrigðiseftirliti Reykjavíkur. „Í upphafi þessa kjörtímabils kallaði ég eftir áliti borgarlögmanns á því hvort heilbrigðiseftirlitið bæri ekki með rétta leiðbeiningarskyldu gagnvart veitingamönnum og öðrum umsækjendum hjá embættinu. Þetta álit staðfesti auðvitað að svo væri. Ég kallaði ekki eftir þessu áliti í neinu tómarúmi heldur einmitt vegna þess að embættið hafði í lengri tíma neitað að því bæri nokkur skylda til að leiðbeina umsækjendum í gegnum það völundarhús sem regluverkið virðist vera.“

Hildur segir að hún sjái því miður ekki að bragarbót hafi orðið á. „Við erum enn þá að fá sambærilegar kvartanir frá veitingamönnum þannig að það þarf greinilega að lyfta grettistaki hvað það varðar.“