Það er ljótt að plata strandveiðimenn

Eftir dúk og disk lagði atvinnuvegaráðherra fram frumvarp um breytingar á lögum um stjórn fiskveiða sem fjallar um strandveiðar og regluverk er þær varða. Frumvarpið var ekki birt í samráðsgátt og fékk svo vikulangan umsagnarfrest í þinginu, sem innifól langa helgi. Valkyrjurnar eru jú sjúkar í samráð. Í fljótu bragði man ég ekki eftir þingmáli þar sem kynning á efni frumvarps er jafn mikið á skjön við raunverulegt innihald.

Ríkisstjórnin, með Flokk fólksins í forystu, segir við strandveiðisjómenn: Nú fáið þið að veiða í 48 daga á hverju strandveiðitímabili, fullan skammt upp á 774 kg á dag, samtals 37,2 tonn á hvern bát. Þetta safnast upp í tæp 32 þúsund tonn takist 850 bátum að fullnýta sýna heimild. Það tekst auðvitað ekki í raunheimum. Veðrið og náttúran, sjáið þið til. En kvótinn sem til þessa er ætlaður er 10 þúsund tonn á ári. Það munar allnokkru á 10 þúsund tonnum og 32 þúsund tonnum.

Í frumvarpinu segir: „Viðbótaraflamagn skal dragast frá því aflamagni sem dregið verður frá heildaraflamarki skv. 3. mgr. 8. gr. og lækka árlega og skal að fullu fært til baka eigi síðar en á fiskveiðiárinu 2028/2029.“ Sem sagt, strandveiðimennirnir skulu borga þennan „yfirdrátt“ til baka á næstu þremur árum.

Þetta þýðir í raun að verði heildarveiði strandveiðiflotans þetta árið 20 þúsund tonn, 10 þúsund tonn umfram útgefið aflamagn, skulu 3.333 tonn dragast frá árlega næstu þrjú ár. Þannig verður heildarafli næstu þriggja ára 6.666 tonn, í stað 10 þúsund tonna núna. Þá mun heyrast harmakvein úr horni.

Í frumvarpinu segir svo: „Til að unnt sé að tryggja 48 veiðidaga kann að þurfa að gera breytingar á því magni sem heimilt er að veiða í hverri veiðiferð.“ Slíkri lausn hafa strandveiðimenn lýst sem svikum.

Svo er flaggað áformum atvinnuvegaráðherra um frumvarp á haustþingi. Um innihald þess veit enginn enda hefur ráðherra ekki viljað upplýsa um áform sín þrátt fyrir að hafa verið þráspurður. Það eina sem ráðherra hefur sagt er að viðbótarheimildir verði ekki sóttar í „stóra kerfið“ og að ekki verði heldur hróflað við 5,3% kerfinu.

Þá verður ekki feitan gölt að flá og sú staða blasir við að lausnirnar tvær til að jafna út „umframafla“ þessa árs og sóknarþunga þeirra næstu verða að draga af heimildum næstu þriggja ára og minnka leyfilegan afla hvern sóknardag úr 774 kílóum niður í eitthvað töluvert minna.

Á þessari upplýsingaóreiðu ber Flokkur fólksins fulla ábyrgð og hann verður að bera hallann af því að hafa platað strandveiðisjómenn til fylgilags við sig í aðdraganda kosninga og svo með þeim gúmmítékka sem nú á að gefa út, sem allt bendir til að strandveiðisjómenn verði látnir borga með dráttarvöxtum næstu þrjú árin.