Könnun Flestir telja veiðigjald á fiskveiðar mun lægra en raunin er.
Könnun Flestir telja veiðigjald á fiskveiðar mun lægra en raunin er. — Morgunblaðið/Eggert
Aðeins tæpur fjórðungur landsmanna telur sig vita hversu hátt hlutfall af hagnaði fiskveiða sé greitt í veiðigjöld, en þegar spurt var um það hversu hátt hlutfallið væri reyndust svörin nokkuð á reiki

Andrés Magnússon

andres@mbl.is

Aðeins tæpur fjórðungur landsmanna telur sig vita hversu hátt hlutfall af hagnaði fiskveiða sé greitt í veiðigjöld, en þegar spurt var um það hversu hátt hlutfallið væri reyndust svörin nokkuð á reiki.

Þetta kemur fram í niðurstöðum Gallup-könnunar, sem gerð var fyrir Viðskiptablaðið og birt var í gær.

Þegar öll svör um veiðigjaldið voru tekin saman var meðaltalið 22%, þannig að hald þorra fólks virðist vera að það sé þriðjungi lægra en það í raun og veru er.

Alls höfðu 37% rétt fyrir sér um að veiðigjald væri á bilinu 30-39%, en það er samkvæmt núgildandi lögum 33% af hagnaði fiskveiða. Hins vegar voru 55% svarenda á því að það væri undir 30%, þar af 17% sem héldu að það væri á bilinu 0-9%. Tæp 8% héldu hins vegar að það væri 40% eða hærra.

Allt önnur staða blasir við þegar horft er til svara þeirra sem játuðu að vita ekki hvert hlutfallið væri. Aðeins 18% töldu að það væri á bilinu 30-39%, en 71% svarenda taldi það lægra en raun ber vitni.

Einnig var spurt um hversu hátt hlutfall af hagnaði menn teldu eðlilegt að greitt væri í veiðigjald.

Meðaltal þeirra svara var 35,7%, sem er litlu hærra en hið raunverulega 33% veiðigjald.

22% svarenda töldu veiðigjaldið eiga að vera á svipuðu róli og nú, ríflega 35% að það ætti að vera lægra en nú, 11% að 40-49% væri eðlilegt, 22% að það væri 50-59% en 10% að það ætti að vera 60% eða hærra.

Spurt var 15.-30. maí, en af 1.844 manna úrtaki svöruðu 818 (44,4%).

Höf.: Andrés Magnússon