Stjórnvöld í Sýrlandi hafa nú leitt í lög ákvæði sem skyldar konur til að hylja líkama sinn enn frekar í almenningi. Þær konur sem t.a.m. vilja njóta sólarinnar á baðströndum verða nú að klæðast svokölluðum sundbúrkum eða öðrum „íhaldssömum“ klæðnaði. Ekki er leyfilegt að klæðast sundbolum að vestrænni fyrirmynd eða bikiníklæðnaði. Slík hegðun varðar við lög og getur leitt til refsingar eða fangelsisvistar.
Frá brotthvarfi Bashars al-Assads fv. Sýrlandsforseta í desember sl. hafa heittrúaðir íslamistar skert mjög réttindi kvenna í landinu. Hin nýju blygðunarlög eiga jafnt við um heimamenn og þá ferðamenn sem kjósa að sækja Sýrland heim.
„Gestir baðstranda og sundlauga, hvort sem það eru erlendir ferðamenn eða heimafólk, eru skyldaðir til að klæðast viðeigandi sundfatnaði sem tekur tillit til blygðunarsemi næsta manns og menningar samfélagsins,“ segir í tilkynningu frá ferðamálastofu Sýrlands. Er þar átt við sundfatnað sem hylur svo gott sem allt bert hold kvenna.
Lögin taka þó ekki einungis til þess svæðis sem skilgreina má sem baðströnd eða sundlaug. Konur þurfa einnig að klæðast fatnaði yfir sundbúrkuna eða síðum sloppi þegar ferðast er á milli heimilis og sundstaða eða baðstrandar.
Karlmenn mega áfram vera berir að ofan á sundstöðum og baðströndum. Þeim er þó ekki heimilt að vera berir að ofan annars staðar í almenningi, s.s. á veitingastöðum, verslunum eða hótelsvæðum öðrum en við sundlaugar.
Þá mega þau föt sem kynin kjósa að klæðast ekki vera gagnsæ eða „of þröng“. Ekki virðist þó liggja fyrir nákvæm skilgreining á því hvað telst vera „of þröngur“ fatnaður í augum löggjafans. khj@mbl.is
Til baka
Leita í greinasafni
Prenta grein