Rangar sakargiftir og skjalafals

Jón Óttar Ólafsson, fv. lögreglufulltrúi hjá embætti sérstaks saksóknara, hefur kært Ólaf Þór Hauksson, héraðssaksóknara og áður sérstakan saksóknara, fyrir rangar sakargiftir í tengslum við rannsókn á meintum brotum tengdum vinnu hans fyrir þrotabú Milestone 2011-12.

Í kærunni, sem lögð var fram á mánudag, er fullyrt að Ólafur Þór hafi árið 2012 lagt fram kæru á hendur honum gegn betri vitund, sem byggði á röngum forsendum og fölsuðum gögnum.

Máli sínu til stuðnings leggur Jón Óttar fram gögn og vísar á fleiri, sem benda til þess að sérstökum saksóknara hafi verið fullkunnugt um að kæran hafi ekki verið á rökum reist.

Ásakanirnar snúa meðal annars að því að Ólafur hafi vísvitandi látið undir höfuð leggjast að leggja fram gögn sem sýndu fram á að vinna Jóns Óttars fyrir skiptastjóra Milestone hefði verið heimiluð af öðrum saksóknara innan embættisins, Hólmsteini Gauta Sigurðssyni, og að sérstökum saksóknara hafi verið kunnugt um það.

Segir saksóknara hafa falsað

Jón Óttar heldur því fram að kæran hafi verið sett fram „gegn betri vitund“ og byggt á samningi sem Ólafur hafi útbúið sjálfur og ranglega dagsett aftur í tímann. Tveir starfsmenn hans vottuðu samninginn, en Ólafur játaði síðar hið sanna í skýrslutöku.

Einnig er því haldið fram að Ólafur hafi vísvitandi rangfært starfslok Jóns Óttars og samstarfsmanns hans hjá fyrirtækinu PPP, sem nú er látinn, og sagt þá ekki hafa haft heimild til að vinna fyrir skiptastjóra Milestone þrátt fyrir að þeir hafi haft opinn aðgang að gögnum og tölvukerfum embættisins eftir formleg starfslok, og raunar áfram haft skrifstofu í húsakynnum þess. Til þessa dags hafi engin tilraun verið gerð til þess að endurheimta eða láta eyða umdeildum gögnum málsins.

Þá er greint frá innanhússminnisblaði Huldu Maríu Stefánsdóttur til Sigríðar J. Friðjónsdóttur ríkissaksóknara sumarið 2012, sem skorað er á lögreglu að afla. Í kærunni er staðhæft að þar hafi Hulda greint frá tölvupósti, sem sýni fram á sakleysi Jóns Óttars, og notað orðin „að ljúga“ um ásakanir saksóknara. Ríkissaksóknari felldi rannsóknina niður snemma árs 2013.

Minnt er á að refsing fyrir rangar sakargiftir sé allt að tíu ára fangelsi. Þær fælu einnig í sér „velferðarmissi“ borgara af hálfu löggæslunnar, en hún er skyldubundin refsihækkunarástæða með hárri lágmarksrefsingu, tveggja ára fangelsi. Að auki er bent á ætlaða misnotkun saksóknara á stöðu sinni, sem sé til frekari refsiauka. Því fyrnist brotið á 15 árum og er málið tækt til rannsóknar fram til 2027.