Héraðssaksóknari kærður til lögreglu

Jón Óttar Ólafsson hefur kært Ólaf Þór Hauksson héraðssaksóknara til lögreglu fyrir rangar sakargiftir um trúnaðarbrot í máli árið 2012, en þá gegndi Ólafur embætti sérstaks saksóknara. Ríkissaksóknari felldi málið niður snemma árs 2013.

Kærandinn Jón Óttar starfaði sem lögreglufulltrúi hjá embætti sérstaks saksóknara árin eftir hrun uns hann lét af störfum í upphafi árs 2012, en sinnti þó nokkru lengur verkefnum fyrir embættið sem sérfræðingur í verktöku. Ólafur Þór kærði hann fyrir brot á þagnarskyldu þá um vorið.

Í kæru sinni til lögreglustjórans á Vesturlandi tíundar Jón Óttar, sem nýlega barst í fréttir af svonefndu njósnamáli, að sérstakur saksóknari hafi lagt fram kæru á hendur sér gegn betri vitund, kæran hafi verið röng og byggð á rangfærðum samningi, sem saksóknari hafi sjálfur útbúið. Hins vegar hafi sérstakur saksóknari látið hjá líða að leggja fram tölvupósta sem sönnuðu sakleysi Jóns Óttars.

Þrátt fyrir að töluvert sé liðið frá þessum atburðum hefur málið ekki fyrnst, enda er þyngsta refsing við ætluðum brotum meiri en tíu ár. » 4