Magnús Magnússon
Magnús Magnússon
Viðreisn – nýr pólitískur talsmaður Hamas-hryðjuverkasamtakanna.

Magnús Magnússon

Viðreisn með utanríkisráðherrann knáa og ferðaglaða er búið að taka að sér að vera pólitískt bakland Vináttufélags Íslands og Hamas-hryðjuverkasamtakanna á Íslandi sem og víðar í Evrópu.

Pólitískt bakland Vináttufélagsins Ísland og Hamas-hryðjuverkasamtakanna, skammstafað VÍHH, þurrkaðist út í kjölfar þess að Vinstrihreyfingunni – grænu framboði, VG, var sópað út af þingi í síðustu alþingiskosningum. Félagar í VÍHH hafa síðustu tugi ára verið mjög virkir innan VG, svo sem með setu á öllum framboðslistum VG í alþingiskosningum sem og í sveitarstjórnarkosningum. En nú hefur Viðreisn tekið þetta hlutverk að sér undir vasklegri framgöngu utanríkisráðherra.

Herskár utanríkisráðherra

Annars er það með hreinustu ólíkindum að fylgjast með utanríkisráðherra í árásum hennar á Ísrael og Ísraelsmenn síðustu vikur og mánuði. Ekki get ég ímyndað mér hvað almennir kjósendur Viðreisnar segja um þessi útspil formanns flokksins, hvað þá heldur Þorsteinn Pálsson eða Helgi Magnússon guðfeður Viðreisnar. Ekki nóg með að utanríkisráðherra gengist fyrir því að mynda „bandalag“ með fimm öfgafyllstu vinstri stjórnmálamönnum í Evrópu og þekktum hatursmönnum Ísraels og Ísraelsmanna, svo sem frá Spáni og Írlandi, heldur hefur utanríkisráðherra Íslands einnig blandað sér í málefni dómstólsins í Haag. Hefði ég nú haldið að Spánn hefði ekkert efni á því að vera að derra sig við Ísrael eftir að Spánverjar á sínum tíma þurrkuðu út alla frumbyggja heillar heimsálfu, Inka og Asteka, sem voru frumbyggjar Suður-Ameríku. Utanríkisráðherra Spánar hefur greinilega sofið í grunnskólanum þegar verið var að kenna sögu Spánar eða kannski er sú ljóta saga bara ekki kennd í skólum á Spáni. Svo bætti utanríkisráðherra um betur með því að láta starfsmenn utanríkisráðuneytisins eyða tíma sínum í að skrifa einhverja greinargerð til Alþjóðadómstólsins í Haag um Gasa en dómstóllinn hefur ekki einu sinni lögsögu á því svæði. Á sama tíma hefur utanríkisráðherra ekki miklar áhyggjur af þessum 60 gíslum sem Hamas-hryðjuverkasamtökin halda enn geymdum í undirgöngunum undir Gasa frá hryðjuverkaárásinni viðurstyggilegu 7. október 2023 sem hóf þetta viðbjóðslega stríð á Gasa. Gíslunum haldið í 600 daga en eins og menn muna voru þeir allt frá níu mánaða gömlum börnum til 90 ára gamallar konu. Enginn veit hversu mörgum af þessum gíslum var raðnauðgað eða misþyrmt, trúlega flestum.

Gleyminn utanríkisráðherra

Til að bæta síðan gráu ofan á svart „gleymdi“ ráðherra að láta utanríkismálanefnd Alþingis vita af þessu brambolti í útlöndum. Í staðinn var hlaupið með alla vitleysuna í RÚV „allra landsmanna“ enda svona mál sjálfkrafa tekin inn í fréttatíma RÚV þar sem sú fréttastofa er stærsta og best fjármagnaða áróðursstofa Hamas-hryðjuverkasamtakanna í heiminum fyrir utan Al-Jazeera-ríkisfjölmiðilinn í Katar sem enn hýsir alla helstu forystumenn Hamas-hryðjuverkasamtakanna og fjölskyldur þeirra meðan fólkið á Gasa á ekki túkall með gati.

Kennslustund í stofnskrá Hamas

Ég legg til að utanríkisráðherra og forsætisráðherra valkyrjanna kynni sér stofnskrá Hamas, en þar segir meðal annars: „Ísrael mun verða til og mun halda áfram að vera til þangað til íslam mun eyða því, á sama máta og það (íslam) hefur eytt öðrum áður.“ Væntanlega hafa einhverjir starfsmenn í utanríkisráðuneytinu tíma og getu til að fletta þessu upp á Google og þýða á íslensku fyrir ráðherra.

RÚV og utanríkisráðherra hafa í sameiningu skemmt sér við að tuddast á Ísrael, allra minnsta ríkinu fyrir botni Miðjarðarhafs, þar sem búa níu milljónir manna, þar af tvær milljónir araba. Í löndunum í kringum Ísrael búa um 400 milljónir araba sem að stærstum hluta vilja gereyða Ísrael og öllum íbúum með. Margir hverjir með þetta skráð í stjórnarskrám sínum. Það er alger skömm þeim sem styðja svona lagaðan þankagang.

Utanríkisráðherra segir að betra sé að tala en þegja, sem er alveg rétt, en ef maður kýs að tala þá er eins gott að vita hvað maður er að tala um.

Lög nr. 19

Svo má bæta því við hvort utanríkisráðherra eða utanríkisráðuneytið viti ekki af því að ríkisstjórn Palestínuaraba setti árið 2004 lög, með viðbótum 2013. Lög sem heita „Amended Palestinian Prisoners Law no. 19 (2004)“.

Samkvæmt þessum lögum fær hver sá arabi sem ræðst á almenna borgara í Ísrael, til dæmis með því að sprengja þá í loft upp, stinga þá með hníf, skjóta eða keyra niður á bíl, laun fyrir viðvikið frá stjórnvöldum í Palestínu, sem sagt hreinræktaðir blóðpeningar. Þetta eru ekki óskrifuð lög, þetta er skrifaður lagabókstafur.

Spurning til dómsmálaráðherra

Að lokum. Mette Frederiksen forsætisráðherra Danmerkur sagði frá því fyrir einhverjum mánuðum að Hamas-hryðjuverkasamtökin væru búin að koma sér upp vopnabúrum í Danmörku. Hefur núverandi dómsmálaráðherra á Íslandi haft dug eða getu til að láta kanna hvort það sama sé upp á teningnum hér á landi?

Óska ég eftir svari sem æskilegt væri að birt yrði opinberlega svo að þjóðin fái að vita en ekki bara ég.

Höfundurinn er rekstrarhagfræðingur og friðarsinni.

Höf.: Magnús Magnússon