Sveinjón Jóhannesson fæddist 6. júlí 1947. Hann lést 2. júní 2025.

Útförin fór fram 10. júní 2025.

Elsku Svenni. Þá er kallið þitt komið, gott að vita af þér lausum frá þeirri þjáningu sem kvaldi þig síðustu ár.

Mig langaði með örfáum orðum að þakka þér fyrir okkar hjúskaparár, dásamlegu strákana okkar sem við eignuðumst saman, Brynjar Örn og Aðalstein Janus. Og hve góður þú varst við fósturdóttur þína, Anítu Rut, sem þú vildir að yrði söngvari.

Ég sendi jafnframt samúðarkveðju til Jóhönnu Þóru og Alberts, til barna þinna og barnabarna.

Elsku Árni, Adda Stína og fjölskyldur, Guð blessi ykkur á þessum erfiða tíma.

Fyrrverandi eiginkona.

Þú átt gott, þú þekkir ekki sárin,

þekkir ei né skilur hjartans mál.

Þrek er gull en gull eru líka tárin,

guðleg svölun hverri þreyttri sál.

Stundum þeim er þrekið prýddi og kraftur,

þögul, höfug féllu tár um kinn.

En sama rósin sprettur aldrei aftur

þótt önnur fegri skreyti veginn þinn.

(GG)

Kolbrún Aðalsteinsdóttir.