Agli svarað

Egill Þórir Einarsson verkfræðingur hefur nýlega skrifað fjórar greinar í Morgunblaðið m.a. um stríðið milli Ísrael og Hamas. Síðasta grein hans birtist 30. maí. Greinina nefnir hann „Palestínuannál 2023-2025“. Þar fer hann óblíðum orðum um Ísrael og sums staðar beinlínis með rangt mál. Á einum stað í grein sinni furðar Egill sig t.d. á hvers vegna „einhliða ofsóknir eins hervæddasta ríkis heims gegn fátækasta fólki jarðar hafi fengið að halda áfram óáreittar“.

Einhliða ofsóknir Ísraela

Er um einhliða aðgerðir Ísraels að ræða? Nei. Það var ráðist á Ísrael og Ísrael er að verja sig. Hér er því alls ekki um neitt einhliða að ræða af hálfu Ísraels. Það eru orsakir og afleiðingar. Orsök stríðsins sem nú geisar er hrottaleg árás Hamas á Ísrael 7. október 2023, þar sem 1.209 óbreyttir borgarar voru myrtir en ekki 1.000 eins og Egill staðhæfir ranglega á öðrum stað í greininni. Auk þess nauðgaði Hamas, limlesti og afskræmdi fólk í Ísrael 7. október, við ósmekklegan fögnuð víða í arabaheimum! Egill gerir lítið úr árás Hamas 7. október; virðist jafnvel afsaka hana með því að þar hafi Hamas bara komið fram líkt og „herraþjóðin í 100 ár“. Það er ekki rétt. Man t.d. ekki eftir að Ísrael hafi hundelt og drepið 364 palestínsk ungmenni á tónlistarhátíð. Maður hlýtur að spyrja sig: Af hverju var Hamas að ráðast á eitt af hervæddustu ríkjum heims, Ísrael? Við hverju bjóst Hamas eiginlega? Að það yrðu engar afleiðingar? Afleiðingin er stríð, sem Hamas eitt ber ábyrgð á og mátti gera ráð fyrir. Ef við hugsum okkur að árás Hamas hefði ekki átt sér stað hefði aldrei komið til stríðs og þá væru yfir 50.000 manns enn á lífi og ekki sú eyðilegging sem nú er bæði í Ísrael og á Gasa, því ekki var um neinar einhliða ofsóknir Ísraela að ræða. Og já, Egill, hinn 7. október 2023 voru Hamas-liðar svo sannarlega drápsvélar og Ísraelsher að verjast þeim.

Fátækasta fólk jarðar

Ísrael er í stríði við Hamas, sem Gasabúar komu til valda 2006, en þá fékk Hamas flest atkvæði í lýðræðislegum kosningum; 44%, en Gasabúar höfðu þá val um 12 flokka. Alltaf er talað um Hamas sem hryðjuverkasamtök en þau eru meira en það: Hamas er við völd á Gasa. Er Hamas fátækasta fólk jarðar svo sem Egill staðhæfir? Nei. Maður þarf ekki annað en að horfa til þess hvernig Hamas-liðar voru útbúnir 7. október 2023 þegar þeir réðust á Kfar Aza í Ísrael úr lofti á svifflugum, úr legi í hátæknikafarabúningum á Zikim-strönd og á láði með sprengjuregni, hríðskotabyssum og myndbandsupptökutækjum til að taka voðaverk sín upp og hreykja sér af þeim. Hergögn sem Hamas notar kosta sitt. Neðanjarðargöngin hafa líka kostað sitt. Fyrir hvort tveggja hafa Gasa-búar þurft að gjalda. Í loftkældum hluta neðanjarðarganganna flúði m.a. Samr, eiginkona fv. foringja Hamas, Yahya Sinwar, 7. október 2023, í öruggt skjól með fjögurra milljóna króna Hérmes Birkin-tösku sína, sem Ísraelsher náði myndum af. Tilheyrir frúin fátækasta fólki jarðar, Egill? Hversu siðblint og spillt er það að vera með svona dýra tösku meðan flestir á Gasa eiga ekki fyrir salti í grautinn; líða skort og búa við hungurmörk? Hamas hefur arðrænt Gasabúa til að fjármagna stríð við Ísrael. Fv. leiðtogi Hamas (2007-2017), Ismail Haniyeh, sem græddi milljónir á að taka toll af öllum innflutningi til Gasa frá Egyptalandi, var búinn að koma fjölskyldu sinni frá Gasa til Katar í öruggt skjól, því hann vissi vel hvaða eftirmál árásin á Ísrael 7. október myndi hafa. Milljónirnar sem Haniyeh græddi hefðu getað satt hungur Gasabúa margfalt. Fátækasta fólk jarðar? Maður spyr sig – meðal Gasabúa eru allavega flugríkir einstaklingar, sem virðast gera fátt fyrir landa sína.

Dæmisagan

Meirihluti greinar Einars fer í það sem hann nefnir dæmisögu. Fyrsta rangfærslan er þar sem Egill segir að „fólk hafi lifað saman í sátt og samlyndi frá örófi alda þar til fyrir 100 árum (1917) að „herraþjóð“ (Ísrael) tók að ofsækja „frumbyggjana“ (Palestínuaraba)“. Gyðingar eru jafnmiklir frumbyggjar og Palestínuarabar. Það þarf ekki annað en að lesa Biblíuna, þá sést að Gyðingar voru í Ísrael fyrir 2025 árum og þeir voru þar líka a.m.k. sex öldum áður (árið 587 f. Krist) þegar þeir voru hraktir frá Jerúsalem og vel fyrir þann tíma. Gyðingar hafa þurft að berjast fyrir landsvæði og tilverurétti sínum í árþúsundir – við Rómverja, Tyrki, Persa o.fl. … og nú í dag Palestínuaraba.

Villidýr

Frekar óviðkunnanlegt er að Egill líkir Ísraelum og reyndar líka Palestínumönnum við dýr í dæmisögu sinni. Við erum e.t.v. öll dýr og þar að auki hættulegasta dýrið í dýraríkinu; en samlíking Egils virðist fremur vera á niðrandi nótum. Ísraelar fara úr því að vera „ofsótt dýr“ í „villidýr“ og svo klykkir hann út með því í lokin að „villidýrin“, þ.e. Ísrael, „taki engum rökum, það þurfi að sýna þeim í tvo heimana“. Ekkert minnst á að þúsundir Ísraela voru í kröfugöngu í Tel Aviv 24. og 29. maí sl. þar sem krafist var loka stríðsins og lausnar gíslanna sem enn eru í haldi Hamas eftir yfir 600 daga. Er kröfugöngufólkið ísraelska villidýr, Egill?