Aldarafmæli sundlaugarinnar

Margir kannast við gömlu útisundlaugina í Reykjanesi við Ísafjarðardjúp. Ekki einungis fólk með tengingar við Vestfirðina heldur einnig vegfarendur í Djúpinu. Sundlaugin á aldarafmæli í sumar.

Í tilefni af því að 100 ár eru liðin frá því að steinsteypt sundlaug var byggð í Reykjanesi við Ísafjarðardjúp, og 91 ár frá því að skólahald hófst þar, verða afhjúpuð tvö söguskilti í Reykjanesi laugardaginn 5. júlí.

Athöfnin hefst klukkan 15 og í tilkynningu kemur fram að öllum sé velkomið að vera viðstaddir og þiggja veitingar.

Afkomendur áttu hugmyndina

Að verkefninu standa afkomendur Aðalsteins Eiríkssonar og Bjarnveigar Ingimundardóttur, fyrstu skólastjórahjóna í Reykjanesi (1934-1944), og Páls Aðalsteinssonar og Guðrúnar Hafsteinsdóttur skólastjórahjóna (1952-1966). Áttu afkomendurnir hugmyndina að því að minnast aldarafmælisins.

Sundkennsla var í Reykjanesi allt frá fyrri hluta 19. aldar, fyrst í torflaug, en steinsteypta sundlaugin var byggð 1925 og stækkuð tvisvar á næstu árum. Sundlaugin hefur í gegnum árin verið hituð með sjálfrennandi heitu vatni sem annars rynni ónýtt til sjávar. Reykjanesskóli var héraðsmiðstöð við Ísafjarðardjúp í meira en hálfa öld, frá því að skólinn var stofnaður árið 1934 og þar til skólahald lagðist af árið 1991. Reykjanesskóli var heimavistarskóli og mótaði náttúrufar á Reykjanesi, sem og jarðhitinn sem þar er að finna, allt skólastarfið.

Söguskiltin um sundlaugina og skólann í Reykjanesi verða við flötina neðan við skólann. Sögumiðlun kemur að verkefninu ásamt styrkveitendunum Uppbyggingarsjóði Vestfjarða, Háafelli, HS Orku og Ísafjarðarbæ.