María Reyn­is­dótt­ir, sér­fræðing­ur hjá Skipu­lags­stofn­un, er fróðleiks­fús að eðlis­fari en hún kom þó sjálfri sér nokkuð á óvart þegar hún ákvað að skella sér í meist­ara­nám í skipu­lags­fræði við Land­búnaðar­há­skóla Íslands. Nám­skeið við End­ur­mennt­un LBHÍ kveikti neist­ann. 

María tók nám­skeiðið Skipu­lagsaðferðir til þess að styrkja sig í starfi en hún hef­ur starfað sem sér­fræðing­ur í ferðamál­um í menn­ing­ar- og viðskiptaráðuneyt­inu. Á henn­ar borð hafa stund­um komið verk­efni sem tengj­ast skipu­lags­mál­um. „Nám­skeiðið fjallaði um hvað skipu­lag er og til hvers, hvað skipu­lags­áætlan­ir eru, hvernig mis­mun­andi skipu­lags­stig tengj­ast og hvernig skipu­lags­ferlið geng­ur fyr­ir sig sam­kvæmt lög­um. Þetta var mjög gott yf­ir­lit yfir skipu­lags­mál­in,“ seg­ir María.

„Á þessu nám­skeiði opnaðist má segja nýr heim­ur fyr­ir mér. Í gegn­um umræður í tím­um komst ég að því hvað þetta er fjöl­breytt og áhuga­vert svið. Skipu­lags­fræðin er mjög þverfag­leg en hún teng­ist m.a. arki­tekt­úr, verk­fræði, land­fræði, hag­fræði og sál­fræði. Það heillaði mig ekki síður hve mikla þýðingu hún hef­ur fyr­ir mót­un sam­fé­lags­ins og um­hverf­is­ins sem við búum, störf­um og leik­um í. Skipu­lag hef­ur t.d. áhrif á það hvort við get­um gengið eða hjólað í vinn­una eða út í búð, hvaða úti­vist­ar­mögu­leik­ar eru í nærum­hverfi okk­ar, hvernig upp­lif­un okk­ar er af ferðamanna­stöðum sem við heim­sækj­um og svo mætti áfram telja. Skipu­lag er að mörgu leyti grunn­ur­inn að lífs­gæðum okk­ar. Mér líkaði þetta nám­skeið það vel og leist svo vel á til­hög­un náms­ins þegar ég kynnti mér það, að ég skráði mig í MS í Skipu­lags­fræði, meðfram vinnu.“

Tíma­bundið ástand sem auðgar lífið

„Ég hef alltaf verið fróðleiks­fús og þrífst í um­hverfi þar sem ég er sí­fellt að læra eitt­hvað nýtt. Ég hafði leitt hug­ann að því að bæta ein­hverju við mig á næstu árum, þá kannski helst með stöku nám­skeiðum í gegn­um end­ur­mennt­un eða ein­hvers kon­ar styttra nám, en að ég skuli hafa byrjað í öðru meist­ara­námi kom sjálfri mér svo­lítið á óvart!“

Er það stórt skref að skrá sig í nám þegar maður er kannski bú­inn að koma sér ágæt­lega fyr­ir í líf­inu?

„Já, svo­lítið. Maður spyr sig stund­um hvað maður er að hugsa að leggja þetta á sig, svona þegar börn­in manns eru orðin sjálf­stæðari og fjöl­skyldu­lífið rétt farið að ró­ast aðeins, af hverju að fórna þeim aukna frí­tíma sem skap­ast í meiri vinnu sem námsmaður? Frí­tíma sem gæti ann­ars farið t.d. í lík­ams­rækt, ferðalög eða fé­lags­líf. Maður þarf vissu­lega að segja oft­ar nei við svo­leiðis hlut­um, sem get­ur verið leiðin­legt. En þá minni ég mig á að þetta er tíma­bundið ástand, sem auðgar lífið á end­an­um. Það er hress­andi að hrista aðeins upp í hausn­um á sér og í raun ekk­ert gal­inn tími til þess að gera það ein­mitt þegar margt í líf­inu er komið í fast­ari skorður.“

María seg­ir öðru­vísi að vera í námi núna en þegar hún var yngri. mbl.is/​Krist­inn Magnús­son

Til­gang­ur lífs­ins er þroski

„Ég er markaðsfræðing­ur í grunn­inn og með meist­ara­gráðu í ferðamála­fræði. Bæði þessi fög, eins og svo mörg önn­ur, hafa snerti­flöt við skipu­lags­fræðina. Þar sem skipu­lags­fræðin er svo þverfag­leg grein þá held ég að það sé kost­ur að hafa bak­grunn í öðru og geta tengt fög­in sam­an. Ef maður horf­ir á stóru mynd­ina þá hugsa ég að skipu­lags­fræðin sem aka­demískt fag verði líka öfl­ugri þegar þekk­ing fólks kem­ur sam­an úr ólík­um átt­um.

Að þessu sögðu þá var það að fara í þetta nám ekki út­pælt hjá mér frek­ar en fyrra nám held­ur kom það til af frem­ur óvænt­um áhuga. Ég held að allt nám sé gott í sjálfu sér, það þrosk­ar mann, en eins og afi minn heit­inn sagði þá er sjálf­ur til­gang­ur lífs­ins þroski og ég fæ að gera hans orð að mín­um.“

Er öðru­vísi að vera í há­skóla­námi núna miðað við áður?

„Það er vissu­lega aðeins öðru­vísi. Það eru fleiri hlut­ir að keppa um tíma og at­hygli manns núna, eins og fjöl­skyld­an og vinn­an. En eins og á fyrri náms­ár­um þá hefst þetta með góðri skipu­lagn­ingu og hæfi­leg­um sjálf­saga. Skiln­ings­rík fjöl­skylda og vinnu­veit­andi hjálpa líka til. Annað sem er öðru­vísi er að maður sinn­ir nám­inu með minna sam­felld­um hætti. En á móti kem­ur að maður býr að starfs­reynslu sem nýt­ist í nám­inu þannig að maður fær á viss­an hátt meira út úr því og stund­ar það jafn­vel af meiri áhuga en ella, vegna þess. Enn annað sem ég get nefnt er tækn­in sem hef­ur breyst mikið frá því að ég stundaði nám síðast, t.d. er frá­bært að geta sótt tíma og jafn­vel klárað heilu nám­skeiðin í gegn­um fjar­kennslu.“

Hvað hef­ur námið gert fyr­ir þig per­sónu­lega?

„Mér finnst það hafa víkkað sjón­deild­ar­hring­inn, strax á þetta skömm­um tíma, svo ég hlakka til að halda áfram! Það efl­ir líka á viss­an hátt sjálfs­traustið að finna að maður get­ur til­einkað sér nýja þekk­ingu jafn vel og áður. Ég kom sjálfri mér t.d. á óvart á nám­skeiði í landupp­lýs­inga­kerf­um á síðustu önn þar sem ég var far­in að teikna upp alls kon­ar kort og gera ýmsa út­reikn­inga í gegn­um ákveðið for­rit sem ég hafði ekki einu sinni heyrt um áður. Þetta var al­veg nýtt fyr­ir mér og nú lít ég allt öðrum aug­um á þema landa­kort­in sem maður sér t.d. oft í frétt­um, nú þegar ég hef fengið inn­sýn inn í vinn­una á bak við þau.“

„Flest­ir hafa skoðanir á skipu­lags­mál­um“

Ertu far­in að pæla meira í skipu­lagi al­mennt?

„Já al­gjör­lega. Ég, eins og ef­laust fleiri, var ekki al­veg klár á því hvað skipu­lags­fræði væri og þýðingu henn­ar fyr­ir sam­fé­lagsþróun. Orðið skipu­lags­fræði hljóm­ar frek­ar þurrt og í op­in­berri umræðu koma skipu­lags­mál gjarn­an fyr­ir sem dá­lítið þung í vöf­um. En flest­ir hafa skoðanir á skipu­lags­mál­um, sér­stak­lega þegar þau varða breyt­ing­ar á nærum­hverf­inu t.d. vegna ný­bygg­inga inn­an hverfa eða breyt­inga á sam­göngu­innviðum. Eða mál sem eru mikið í umræðunni eins og virkj­ana­mál, Borg­ar­lín­an, Reykja­vík­ur­flug­völl­ur og upp­bygg­ing ferðaþjón­ustu á há­lend­inu. Mjög mörg mál eru nefni­lega skipu­lags­mál og nú finnst mér ég sjá þau alls staðar! Óneit­an­lega tek ég líka meira eft­ir hlut­um í um­hverf­inu sem ég tók kannski ekki eft­ir áður. Velti fyr­ir mér hvers kon­ar um­hverfi mér líður vel í og hvers kon­ar um­hverfi mér líður síður vel í, og hvað það er í skipu­lag­inu sem get­ur valdið því.“

Hvernig er framtíðin?

„Hún er sann­ar­lega björt fyr­ir skipu­lags­fræðinga en maður skynj­ar að það er vönt­un á fólki með þessa þekk­ingu. Áskor­an­ir í sam­fé­lag­inu og um­hverf­inu virðast verða sí­fellt fleiri og flókn­ari og skipu­lags­fræðin get­ur skipt miklu máli við að mæta þeim. Í því sam­hengi má nefna hraða fólks­fjölg­un hér á landi og skort á hús­næði sem því fylg­ir, þróun at­vinnu­vega eins og ferðaþjón­ustu og fisk­eldi þar sem gæta þarf jafn­væg­is milli nýt­ing­ar og vernd­ar nátt­úru­auðlinda, og lofts­lags­mál­in sem þarf að taka mið af við skipu­lags­gerð, bæði til að draga úr los­un gróður­húsaloft­teg­unda og til að aðlag­ast lofts­lags­breyt­ing­um. Land er tak­mörkuð auðlind, sam­keppni um land­notk­un eykst og henni tengj­ast oft mikl­ir og ólík­ir hags­mun­ir, svo það er klár­lega spenn­andi framtíð í þessu fagi. Ég vona að framtíð mín sé björt líka. Ég er sem stend­ur í tíma­bundn­um vista­skipt­um hjá Skipu­lags­stofn­un og skemmti­legt að kynn­ast starf­sem­inni þar. Hvert námið leiðir mig mögu­lega á end­an­um kem­ur svo bara í ljós.“

Tengd­ar frétt­ir

Frama­kon­ur

Sara Miller út­skrif­ast frá Bif­röst en vill verða dýra­lækn­ir

• Sigrún Ósk kom­in með nýtt starf
• „Þetta er gæðastimp­ill og ótrú­lega dýr­mæt reynsla“
• Upp­lifði skömm þegar hún var yngri
• Kynnt­ust í átt­unda bekk og eiga nú sam­an fyr­ir­tæki

» Fleiri tengd­ar frétt­ir

Mennt­un er mátt­ur

Elín Metta út­skrifaðist sem lækn­ir

• „Það þarf að bjóða upp á breiðara nám“
• Böðvar kom­inn með rétt­ind­in
• „All­ar mik­il­væg­ustu orr­ust­urn­ar í líf­inu eiga sér stað inni í hausn­um á mér“
• Útskrifaðist fimm­tug eft­ir bar­áttu við brjóstakrabba­mein

» Fleiri tengd­ar frétt­ir