Smartland Mörtu Maríu | Frami | mbl | 29.4.2025 | 6:00 | Uppfært 7:06

Vigdís Häsler stofnar ráðgjafarfyrirtæki

Vigdís Ósk Häsler Sveinsdóttir. Ljósmynd/Innanríkisráðuneytið

Vigdís Ósk Häsler Sveinsdóttir, eða Vigdís Häsler eins og hún er kölluð, lögfræðingur, fyrrverandi aðstoðarmaður ráðherra og fyrrverandi framkvæmdastjóri Bændasamtakanna, hefur stofnað fyrirtæki.

Í Lögbirtingablaðinu kemur fram að Vigdís hafi stofnað félagið Skotland Slf. Tilgangur félagsins er ráðgjafarþjónusta og annar skyldur rekstur.

Vigdís lét af störfum sem framkvæmdastjóri Bændasamtakanna fyrir ári síðan og sagði frá því á Facebook-síðu sinni að því tilefni að starfið hefði verið gefandi og skemmtilegt.

„Í dag lét ég af störfum sem framkvæmdastjóri Bændasamtaka Íslands, skemmtilegu og gefandi starfi sem ég hef sinnt síðastliðin þrjú ár og komið að mörgum krefjandi verkefnum, stórum sem smáum.

Samtökin standa núna styrkum fótum eftir fjárhagslega og félagslega endurskipulagningu og uppbyggingu. Á sama tíma hefur verið byggður upp öflugur og verðmætur mannauður á skrifstofu samtakanna. Þar að auki hafa félagsmenn Bændasamtakanna aldrei verið fleiri og er stefna samtakanna nú orðin skýr eftir vel heppnaða stefnumótun. Rekstur Bændablaðsins hefur einnig verið réttur af og er blaðið nú orðinn mest lesni prentmiðillinn og lesendahópurinn hefur breikkað svo um munar. Almenn umræða um landbúnað sem hluta af mikilvægum innviðum og fæðuöryggi hefur stóraukist. Bændur eru lykilþáttur í að tryggja sjálfsaflahlutdeild íslensku þjóðarinnar í fæðuframleiðslu og höfum við í Bændasamtökunum unnið ötullega að þessu markmiði síðastliðin ár. Ég skil stolt við starfið og Bændasamtökin sem eru orðin að sterku hagsmunafli sem vinnur í þágu bænda,“ segir Vigdís á Facebook.

Smartland óskar Vigdísi góðs gengis með ráðgjafarfyrirtækið!