Gunn­ar Smári Jón­björns­son og unn­usta hans Lilja Kjart­ans­dótt­ir voru gest­ir Krist­ín­ar Sifjar í Dag­mál­um á dög­un­um. Þar sögðu þau sögu sína af stóru áfalli sem skall á litlu fjöl­skyld­una þann 28. nóv­em­ber 2023 þegar Gunn­ar Smári veikt­ist skyndi­lega eft­ir að meðfædd­ur hjarta­galli gerði vart við sig með þeim af­leiðing­um að Gunn­ar Smári barðist fyr­ir lífi sínu.

Byrjaði sem ósköp venju­leg­ur dag­ur 

Að sögn Gunn­ars og Lilju var um ósköp venju­leg­an þriðju­dag að ræða. Að öllu leyti nema að Gunn­ari leið eins og hann væri aðeins slapp­ur en gaf því ekki mik­inn gaum. Hann ákvað að skella sér á morgu­næf­ingu líkt og hann var van­ur að gera en fé­lag­ar hans tóku eft­ir því að hann var ekki al­veg eins og hann átti að sér að vera.

Gunn­ar harkaði af sér slenið og dag­ur­inn leið eins og venju­lega. Þegar dag­inn tók að líða og kvöld­mat­ar­leytið nálgaðist eldaði hann kvöld­verð fyr­ir fjöl­skyld­una og lék sér við dótt­ur dótt­ur sína.

Greip um hjartað og leið út af stuttu síðar

Lilja seg­ir þau hafa verið kom­in upp í rúm og til­bú­in að fara að sofa þegar Gunn­ar Smári sprett­ur skyndi­lega upp í rúm­inu og gríp­ur um brjóst­kass­ann þar sem hjartað er staðsett. Hún seg­ir hann hafa öskrað: „Hvað var þetta?“ og báðum var þeim mjög brugðið. Þegar Lilja bar upp þá hug­mynd að hringja á Neyðarlín­una neitaði Gunn­ar Smári því en hann rétt svo náði að sleppa orðinu áður en hann leið út af. 

„Ég hringi á Neyðarlín­una og hann er al­veg meðvit­und­ar­laus. Hann svar­ar ekki þegar ég pikka í hann og þeir eru með mig á lín­unni,“ lýs­ir Lilja sem var, líkt og gef­ur að skilja, mjög ótta­sleg­in á þess­um tíma­punkti.

Hún seg­ir stutta stund hafa liðið þar til Gunn­ar tók að svara henni aft­ur. Lá hann þá á mag­an­um á gólf­inu og barðist við að ná and­an­um með mik­illi áreynslu, átök­in voru það mik­il að svit­inn perlaði af lík­ama Gunn­ars Smára.

Leiðbeindi sjúkra­flutn­inga­fólki meðan hann barðist fyr­ir lífi sínu

Vin­ir Gunn­ars Smára mættu á heim­ili þeirra til að aðstoða við að flytja hann á spít­ala en Gunn­ar Smári starfaði áður sem sjúkra­flutn­ingamaður. Þar lá hann á gólf­inu í um það bil tíu fer­metra rými um­vaf­inn góðu fólki sem vildi hon­um allt það besta.

„Þar er hann á gólf­inu. Þar er ég og þar eru þau þrjú. Svo koma tvær lögg­ur og það er bara allt að ger­ast og litla stelp­an okk­ar sof­andi svona tveim­ur metr­um frá hon­um. Hann bara ligg­ur þarna og er auðvitað lærður svo hann seg­ir: „Verk­ur fyr­ir miðju brjósti, verk­ur fyr­ir miðju brjósti“ hann gat al­veg sagt það og sagði svo: „hringdu í mömmu þína og fáðu hana til að passa“,“ seg­ir Lilja og lýs­ir karakt­er­ein­kenn­um Gunn­ars svo vel; góður leiðbein­andi sem gefst aldrei upp.

Hún seg­ir að á þess­um tíma­punkti hafi Gunn­ar verið virki­lega kval­inn og átti hún sjálf erfitt að horfa upp á það sem var að ger­ast.

Man ekki eft­ir at­vik­inu

Aðspurður seg­ist Gunn­ar ekki muna eft­ir því sem gerðist þetta kvöld.

„Á ein­um tíma­punkti spurði hann: „er ég með púls?““ bæt­ir Lilja við. 

Gunn­ar var flutt­ur á sjúkra­húsið á Akra­nesi. Þangað fylgdi Lilja hon­um, enda hef­ur hún staðið við hlið hans eins og klett­ur í gegn­um þessi erfiðu veik­indi. Litla stúlk­an þeirra varð eft­ir heima í um­sjá Lög­regl­unn­ar á meðan beðið var eft­ir því að móðir Lilju kom til að ann­ast dótt­ur þeirra.

Á sjúkra­hús­inu var Gunn­ar Smári ít­ar­lega skoðaður og talið að lík­leg­ast væri um hjarta­áfall að ræða. Í kjöl­farið var hann flutt­ur til Reykja­vík­ur til frek­ari aðhlynn­ing­ar. Gunn­ar Smári var þungt hald­inn og barðist fyr­ir hverj­um and­ar­drætti. Að sögn Lilju reynd­ist það henni afar erfitt að horfa upp á ást­ina í líf­inu henn­ar í þess­um aðstæðum.

Á meðan lækn­ar á sjúkra­hús­inu á Akra­nesi héldu að Gunn­ar Smári væri að fá hjarta­áfall var blóðþynn­ingu dælt í hann. Það átti þó eft­ir að koma í ljós að ekki var um hjarta­áfall að ræða. 

Smelltu á hlekk­inn hér að neðan til að nálg­ast viðtalið við Gunn­ar Smára og Lilju í heild sinni. 

Bjargaði lífi Gunn­ars að kran­sæðin losnaði frá hjart­anu

Tengd­ar frétt­ir

Dag­mál

„Þró­un­in er sann­ar­lega áhyggju­efni“

• Fjöl­menn­ing­ar­fræðing­ar vand­inn frek­ar en lausn­in
• Byrja að reykja gras áður en þau bragða áfengi
• Börn fár­veik eft­ir að hafa sniffað gas úr svita­lyktareyði
• Heimsend­ing­arþjón­usta á fíkni­efn­um fljót­ari en á pítsu

» Fleiri tengd­ar frétt­ir

• Blogga um frétt